SRH vs LSG Weather Update : आयपीएल 2024 चा 57 वा सामना 8 मे रोजी सनरायझर्स हैदराबाद आणि लखनौ सुपर जायंट्स यांच्यात खेळला जाणार आहे. हैदराबादच्या राजीव गांधी आंतरराष्ट्रीय स्टेडियमवर दोन्ही संघ आमनेसामने येणार आहेत. प्लेऑफच्या शर्यतीचा विचार करता या दोन्ही संघांसाठी हा सामना अत्यंत महत्त्वाचा ठरणार आहे.

या सामन्याच्या निकालाचा परिणाम इतर संघांवरही होणार आहे. मात्र हैदराबादमध्ये होणाऱ्या सामन्यापूर्वी हवामानाबाबत एक मोठे अपडेट समोर आले आहे ज्यामुळे दोन्ही संघांचा तणाव वाढू शकतो.

SRH विरुद्ध LSG सामन्यापूर्वी हवामानाचे मोठे अपडेट

हैदराबादमध्ये सध्या हवामान चांगले नाही आणि आज संध्याकाळी वादळी वाऱ्यासह पाऊस पडण्याची शक्यता आहे. त्याच वेळी, सामन्याच्या दिवशी सकाळी हवामान स्वच्छ राहण्याची अपेक्षा आहे, परंतु सामना सुरू होण्याच्या आधी संध्याकाळी 6 वाजता पाऊस पडण्याची शक्यता आहे. सध्या, सामन्याच्या आधी पाऊस पडण्याची 32% शक्यता आहे. आणि जर परिस्थिती बिघडली तर सामना रद्द होऊ शकतो किंवा खेळ सुरू होण्यास उशीर होऊ शकतो.

पावसामुळे बिघडणार प्लेऑफची शर्यत!

सनरायझर्स हैदराबादने आतापर्यंत 11 पैकी 6 सामने जिंकले आहेत आणि गुणतालिकेत 12 गुण आणि -0.065 च्या नेट रन रेटने चौथ्या स्थानावर आहे. दुसरीकडे, लखनौ सुपर जायंट्सने देखील 11 पैकी 6 सामने जिंकले आहेत आणि 12 गुण आणि -0.371 च्या नेट रन रेटने ते पाचव्या स्थानावर आहेत.

अशा परिस्थितीत हा सामना जिंकणारा संघ 14 गुणांसह तिसऱ्या क्रमांकावर पोहोचेल. मात्र पावसामुळे खेळ वाहून गेला तर दोन्ही संघांना प्रत्येकी एक गुण मिळेल आणि दोन्ही संघ 13 गुणांवर पोहोचतील. त्यामुळे चेन्नई सुपर किंग्ज गुणतालिकेत पाचव्या स्थानावर पोहोचेल. तो सध्या 12 गुणांसह तिसऱ्या स्थानावर आहे.