IPL 2023 Nitish Rana : नितीश राणाच्या नेतृत्वाखालील कोलकाता नाईट रायडर्सला रविवारी चेन्नई सुपर किंग्जकडून 49 धावांनी पराभव स्वीकारावा लागला. प्रथम फलंदाजी करताना चेन्नईने निर्धारित 20 षटकांत 4 गडी गमावून 235 धावा केल्या. विशाल लक्ष्याचा पाठलाग करताना कोलकाताच्या फलंदाजांनी दमछाक केली आणि त्यांना 20 षटकांत 8 बाद 186 धावाच करता आल्या.

सामना गमावल्यानंतर नितीश राणा म्हणाला, "पराभव पचवणे कठीण आहे. 236 धावांचा पाठलाग करणे नेहमीच कठीण असते, विशेषत: जर तुम्ही पॉवरप्लेमध्ये धावा केल्या नाही त्यावेळी. आमचा संघ चुकांमधून धडा घेत नाही. एवढ्या मोठ्या टूर्नामेंटमध्ये एवढ्या मोठ्या संघांविरुद्ध आम्ही केलेल्या चुका आम्ही पुन्हा करत आहोत, ही एक समस्या आहे. स्पर्धेतील आमची कामगिरी सुधारत नाही.

राणा पुढे म्हणाला, या खेळपट्टीवर 235 धावा देणे मान्य नाही. तथापि रहाणेने ज्या पद्धतीने फलंदाजी केली त्याचे श्रेय त्याला द्यावे लागेल.

प्रथम फलंदाजी करताना चेन्नईने निर्धारित 20 षटकांत 4 गडी गमावून 235 धावा केल्या होत्या. आयपीएलच्या 16व्या मोसमातील ही सर्वोच्च सांघिक धावसंख्या तसेच आयपीएल संघाने ईडन गार्डन्सवर केलेली सर्वोच्च धावसंख्या आहे. यापूर्वी कोलकाताने 2019 मध्ये मुंबई इंडियन्सविरुद्ध या मैदानावर 2 बाद 232 धावा केल्या होत्या.

लक्ष्याचा पाठलाग करताना कोलकाताच्या फलंदाजांनी चेन्नईच्या गोलंदाजांसमोर नांग्या टाकल्या. त्यांना 20 षटकांत 8 बाद 186 धावाच करता आल्या. जेसन रॉय (61) आणि रिंकू सिंग (नाबाद 53) यांनी चांगली खेळी खेळली, पण ते त्यांच्या संघासाठी कामी आले नाहीत. चेन्नईचा हा सलग तिसरा विजय आहे तर कोलकाताचा हा सलग चौथा पराभव आहे.