कोलकाता : शेरास सव्वाशेर असा खेळ झालेल्या आयपीएल सामन्यात २०९ धावांचा पाठलाग करताना हैदराबादला पाच धावांनी पराभवाचा सामना करावा लागला. कोलकाताच्या आंद्र रसेलच्या २५ चेंडूत ६४ धावांचे तुफान आले. त्यानंतर हैदराबादच्या क्लासेनने २९ चेंडूत ६३ धावांचा झंझावात सादर केला. कोलकाता संघ १४व्या षटकांत सहा बाद ११९ आणि २०व्या षटकाअखेर सात बाद २०८ या सहा षटकांत आंद्रे रसेल नावाचे वादळ आले. या धावांचा पाठलाग करताना हैदराबादची चार बाद १४५ अशी अवस्था झाली होती; पण अखेरच्या षटकांत १३ धावांच्या आव्हानासमोर त्यांना आठच धावा करता आल्या. त्यामुळे कोलकाताने चार धावांनी सामना जिंकला.

क्लासेनने १९व्या षटकांत मिचेल स्टार्कची धुलाई केली आणि तब्बल २५ धावा कुटल्यामुळे सामना रंगतदार झाला. फिल साल्ट या सलामीवीराने अर्धशतक करूनही संकटात सापडलेल्या कोलकाता संघाला प्रथम रमणदीपने सावरले. त्यानंतर रसेल आणि रिंकू सिंग ३३ चेंडूत ८१ धावांची भागीदारी केली, त्यामुळे कोलकाता संघाला अपेक्षितही नसलेल्या द्विशतकी धावा करता आल्या. कोलकाताचा कर्णधार श्रेयस अय्यरला भोपळाही फोडता आला नव्हता. याच रसेलने गोलंदाजीतही चमक दाखवताना दोन विकेट मिळवल्या.

संक्षिप्त धावफलक

कोलकाता : २० षटकांत ७ बाद २०८ (फिल साल्ट ५४ - ४० चेंडू, ३ चौकार, ३ षटकार, रमणदीप सिंग ३५ - १७ चेंडू, १ चौकार, ४ षटकार, रिंकू सिंग २३ - १५ चेंडू, ३ चौकार, आंद्रे रसेल नाबाद ६४ - २५ चेंडू, ३ चौकार, ७ षटकार, टी. नटराजन ४-०-३२-३, मयांक मार्कंडे ४-०-३९-२) वि. वि. हैदराबाद : २० षटकांत ७ बाद २०४ (मयांक अगरवाल ३२, अभिषेक शर्मा ३२ - १९ चेंडू, ४ चौकार, २ षटकार, हेन्रिक क्लासेन ६३ - २९ चेंडू, ८ षटकार, शाबाझ अहमद १६ - ५

चेंडू, १ चौकार, २ षटकार, हर्षित राणा ४-०-३३-३, आंद्रे रसेल २-०-२५-२)