Mayank Yadav Injured : लखनौ सुपर जायंट्सला मोठा धक्का बसला आहे. संघाचा तुफानी गोलंदाज मयंक यादव जखमी झाला आहे. आणि त्याने गुजरात टायटन्सविरुद्ध पहिली ओव्हर टाकल्यानंतर मैदान सोडले. त्यानंतर तो पुन्हा गोलंदाजी करण्यासाठी मैदानात उतरला नाही.

पहिल्या षटकात त्याने 13 धावा दिल्या. कर्णधार केएल राहुलने डावातील चौथे षटक त्याला दिले होते. तो त्यावेळी 140 किलोमीटर प्रतितास वेगाने गोलंदाजी करताना दिसला. आणि पूर्णपणे लयीत तो दिसत नव्हता. पहिले षटक संपल्यानंतर मयंक फिजिओसोबत मैदानाबाहेर गेला.

मयंक यादव दुखापतीमुळे आधी रणजी ट्रॉफीच्या या मोसमात दिल्लीतून बाहेर पडला होता. मयंक त्याच्या करिअरमध्ये घोट्याच्या दुखापतीने आणि हॅमस्ट्रिंगच्या दुखापतीने हैराण आहे. पंजाब किंग्जविरुद्ध खेळून त्याने आयपीएल कारकिर्दीची सुरुवात केली. आपल्या वेगामुळे तो रातोरात प्रसिद्धीच्या झोतात आला.

त्याने दुसऱ्या आयपीएल सामन्यात रॉयल चॅलेंजर्स बंगळुरूविरुद्धच्या सामन्यात 14 धावांत 3 विकेट घेतल्या. आरसीबीविरुद्ध त्याने ताशी 156.7 किलोमीटर वेगाने चेंडू टाकला. जो आयपीएल 2024 चा सर्वात वेगवान चेंडू ठरला.

मयंक यादवने पंजाब किंग्जविरुद्ध 155.8 किलोमीटर प्रतितास वेगाने गोलंदाजी केली. त्याने 2 सामन्यात 6 विकेट घेतल्या आहेत. मयंकने आपल्या धारदार गोलंदाजीच्या जोरावर सलग दोन सामन्यात प्लेअर ऑफ द अवॉर्ड जिंकण्यात यश मिळविले. आयपीएलच्या इतिहासात ही पहिलीच वेळ आहे जेव्हा एखादा वेगवान गोलंदाज त्याच्या कारकिर्दीतील पहिल्या दोन सामन्यांमध्ये सामनावीर ठरला.