MS Dhoni Viral Video: चेन्नई सुपर किंग्सचा माजी कर्णधार एमएस धोनी जसा त्याच्या शांत स्वभावासाठी आणि चपळाईसाठी ओळखला जातो. पण असे असले तरी अनेकदा संघसहकाऱ्यांबरोबर मस्ती करताना किंवा तो चटकन पण काहीशा विनोदाने उत्तर देतानाही दिसतो.

त्याची हीच बाजू नुकतीच एका कार्यक्रमावेळी दिसली असून त्याचा व्हिडिओही व्हायरल होत आहे.

सध्या आयपीएल 2024 स्पर्धा सुरू असून चेन्नई सुपर किंग्सने दोन सामने खेळले आहेत. यंदाच्या स्पर्धेपूर्वी धोनीने कर्णधारपद सोडले असून ही जबाबदारी ऋतुराज गायकवाडच्या खांद्यावर सोपवली आहे. याचीच आठवणही धोनीने करून दिलेली व्हायरल व्हिडिओमध्ये दिसते.

चेन्नईचा आयपीएल 2024 मधील गुजरात टायटन्सविरुद्धचा दुसरा सामना झाल्यानंतर एका प्रमोशनल इव्हेंटसाठी धोनीसह रचिन रविंद्र, रविंद्र जडेजा आणि शिवम दुबे गेले होते. यावेळी रचिनला त्याच्याकडून गुजरात टायटन्सविरुद्धच्या सामन्यात १५ व्या षटकात साई सुदर्शनचा झेल सुटल्याबद्दल प्रश्न विचारण्यात आला होता.

त्याला विचारण्यात आले होते की झेल सुटल्यानंतर त्याने एमएस धोनीकडे पाहिले का आणि धोनीची त्यावर प्रतिक्रिया काय होती?

यावर रचिन उत्तर देण्यापूर्वीच धोनी आधी म्हणाला, 'हा, पण यावेळी नवीन कर्णधार आहे.' त्यावर सर्वजण हसायला लागले.

त्यानंतर धोनी म्हणाला, 'मी असा व्यक्ती नाही जो खूप प्रतिक्रिया देतो. विशेषत: जेव्हा एखादा खेळाडू पहिला किंवा दुसरा सामना खेळत असतो. मला वाटते ऋतू देखील माझ्यासारखाच आहे. पण रचिनला 360 डिग्री मैदानात इकडून तिकडे पळताना पाहून मजा आली, असं वाटत होतं तो नाचत आहे.'

लक्षात घेण्यासारखी गोष्ट अशी की रचिनने गुजरातविरुद्ध एक झेल सोडला असला, तरी त्याने त्याच सामन्यात तीन अफलातून झेल घेतले होते. इतकेच नाही, तर चेन्नईने आत्तापर्यंत खेळलेल्या दोन्ही सामन्यात त्याने सलामीला फलंदाजी करतानाही शानदार खेळ केला आहे.

त्याने रॉयल चॅलेंजर्स बेंगलुरूविरुद्धच्या सामन्यात 15 चेंडूत 37 धावा केल्या होत्या, तर गुजरात टायटन्सविरुद्धच्या सामन्यात 20 चेंडूत 46 धावा केल्या होत्या. त्याला आयपीएल 2024 लिलावात चेन्नईने 1.8 कोटी रुपयांना खरेदी करत संघात घेतले होते.