Naveen ul Haq LSG vs MI : प्रथम फलंदाजी करणाऱ्या मुंबई इंडियन्सने लखनौ सुपर जायंट्ससमोर विजयासाठी 183 धावांचे आव्हान ठेवले आहे. पहिल्यापासून आक्रमक खेळणाऱ्या मुंबईला नवीन उल हकने मुंबईचे रोहित शर्मा, कॅमरून ग्रीन, सूर्यकुमार यादव आणि तिलक वर्माची शिकार केली. मात्र मुंबईचा इम्पॅक्ट प्लेअर नेहाल वधेराने 12 चेंडूत 23 धावा चोपत मुंबईला 182 धावांपर्यंत मजल मारून दिली. मुंबईकडून ग्रीनने सर्वाधिक 41 तर सूर्याने 33 धावांचे योगदान दिले. तिलकनेही 26 धावा करून हातभार लावला.

मुंबई इंडियन्सने नाणेफेक जिंकून प्रथम फलंदाजी करण्याचा निर्णय घेतला. सलामीवीर इशान किशन आणि रोहित शर्मा यांनी 3 षटकात 30 धावा ठोकल्या. इशान किशन आक्रमक फलंदाजी करत होता तर रोहित शर्मा त्याला सावध साथ देत होता. मात्र चौथ्या षटकात नवीन उल हकने 10 चेंडूत 11 धावा करणाऱ्या रोहित शर्माला बाद करत मुंबईला मोठा धक्का दिला.

सामन्याच्या चौथ्या षटकात रोहित शर्मा 11 धावा करून बाद झाला. त्यानंतर पुढच्याच षटकात इशान किशनला यश ठाकूरने 15 धावांवर बाद केले.

रोहित आणि इशान बाद झाल्यानंतर आलेल्या सूर्यकुमार यादव आणि कॅमरून ग्रीन यांनी मुंबई इंडियन्सचे रनरेट खाली येऊ दिले नाही. सूर्यकुमारने 20 चेंडूत 33 धावा ठोकल्या तर ग्रीनने 41 धावांचे योगदान दिले. या दोघांनी तिसऱ्या विकेटसाठी 66 धावांची भागीदारी रचत संघाला 11 व्या षटकात शतकी मजल मारून दिली.

मुंबई या दमदार सुरूवातीच्या जोगावर मोठी धावसंख्या उभारणार असे वाटत असतानाच नवीन उल हकने आधी सूर्याला आणि मग ग्रीनला बाद करत पाठोपाठ दोन धक्के दिले. यानंतर टीम डेव्हिडही 13 धावांची भर घालून माघारी परतला. टीम डेव्हिड बाद झाल्यानंतर तिलक वर्माने मुंबईला 150 धावांचा टप्पा पार करून दिला. मात्र त्याचीही शिकार नवीन उल हकने केली. वर्मा 21 चेंडूत 22 धावा करून बाद झाला.

नवीन उल हकने मुंबईचे चार फलंदाज बाद केल्यानंतर 19 व्या षटकात मोहसीन खानने फक्त 6 धावा देत ख्रिस जॉर्डनला बाद केले. आता शेवटचे षटक यश ठोकूरने टाकले. मात्र नेहाल वधेराने पहिल्याच चेंडूवर चौकार मारला. मात्र पुढचा चेंडू निर्धाव गेला. मात्र वधेराने पुढच्या दोन चेंडूवर एक षटकार आणि चौकार मारत मुंबईला 180 धावांच्या पार पोहचवले. मात्र शेवटच्या चेंडूवर 12 चेंडूत 23 धावा ठोकणारा वधेरा बाद झाला. मुंबईने लखनौसमोर 182 धावांचा डोंगर उभारला.

(Sports Latest News)