मुंबई : यंदाच्या आयपीएल हंगामात अनेक आश्चर्यकारक घटना घडत आहे. आज आयपीएलच्या 15 व्या हंगामातील 30 व्या सामन्यात राजस्थान रॉयल्सच्या (Rajasthan Royals) सलामीवीरांनी तब्बल 4 धावा पळून (4 Runs By Running) काढल्या. जॉस बटलर (Jos Buttler) आणि देवदत्त पडिक्कल (Devdutt Padikkal) यांनी हा कारनामा केला आहे. विशेष म्हणजे केकेआरकडून (Kolkata Knight Riders) यावेळी कोणताही ओव्हर थ्रो झाला नव्हता. तरी बटलर आणि पडिक्कलने चार धावा पळून काढल्या.

प्रथम फलंदाजी करण्यासाठी उतलेल्या राजस्थानचे सलामीवीर जॉस बटलर आणि देवदत्त पडिक्कल यांनी आक्रमक सुरुवात केली. दरम्यान, उमेश यादव टाकत असलेल्या तिसऱ्या षटकाच्या अखेरच्या चेंडूवर बटलरने कट पॉईंटला फटका मारला. या फटक्यात फारशी ताकद नसल्याने चेंडू संथ गतीने सीमारेषेकडे जात होता. दरम्यान, व्यंकटेश अय्यरने चेंडूचा पाठलाग केला आणि त्याने अगदी अखेरच्या क्षणाला चेंडू सीमारेषा पार करण्यापासून रोखला. मात्र रोखताना चेंडू त्याने दूर फेकला. हा चेंडू परत पकडून तो थ्रो करेपर्यंत बटलर आणि पडिक्कलने पळून 4 धावा पूर्ण केल्या. म्हणजे बटलरने पळून चौकार मिळवला.

शेवटची चौथी धाव पूर्ण करण्यासाठी बटलरला डाईव्ह मारावा लागला. तो रन आऊट होण्यापासून थोडक्यात बचावला. दरम्यान, राजस्थानने केकेआरच्या गोलंदाजांची धुलाई करत 20 षटकात 4 बाद 217 धावांपर्यंत मजल मारली. जॉस बटलरने यंदाच्या हंगामातील आपले दुसरे शतक पूर्ण केले. त्याला संजू सॅमसनने 38 तर हेटमायरने 26 धावांची आक्रमक खेळी करून चांगली साथ दिली.