Chennai Super KIngs: इंडियन प्रीमियर लीग 2024 स्पर्धेतील 59 वा सामना गुजरात टायटन्स आणि चेन्नई सुपर किंग्स संघात होणार आहे. हा सामना अहमदाबादमधील नरेंद्र मोदी आंतरराष्ट्रीय स्टेडियमवर होणार आहे.

हे स्टेडियम चेन्नई सुपर किंग्ससाठी खास आहे. कारण चेन्नईने गेल्याच वर्षी या स्टेडियमवर खेळताना एमएस धोनीच्या नेतृत्वाखाली आयपीएलचे पाचव्यांदा विजेतेपद पटकावले होते. चेन्नईला हे विजेतेपद जिंकून देण्यात अष्टपैलू रविंद्र जडेजाचे मोलाचे योगदान राहिले होते.

आता हे विजेतेपद पटकावल्यानंतर जवळपास एक वर्षाने चेन्नई सुपर किंग्स या स्टेडियमवर पुन्हा एकदा सामना खेळण्यासाठी उतरणार आहे. दरम्यान, हा सामना खेळण्यापूर्वी जडेजाने गेल्यावर्षीच्या अंतिम सामन्यातील विजयी क्षणाची आठवण पुन्हा चाहत्यांना करून दिली आहे.

झाले असे की 2023 आयपीएलच्या अंतिम सामन्यात गुजरात टायटन्स आणि चेन्नई सुपर किंग्स संघ अहमदाबादमध्ये आमने-सामने होते. त्यावेळी पावसामुळे अंतिम सामना राखीव दिवशी खेळवण्यात आला होता. राखीव दिवशीही पावसाचा व्यत्यय आलेला.

दरम्यान अंतिम सामन्यात गुजरातने प्रथम फलंदाजी करताना 20 षटकात 4 बाद 214 धावा केल्या होत्या. त्यानंतर पावसाच्या व्यत्ययामुळे चेन्नईसमोर डकवर्थ लुईस नियमानुसार 15 षटकात 171 धावांचे लक्ष्य ठेवण्यात आले होते.

या लक्ष्याचा पाठलाग करताना चेन्नईला शेवटच्या दोन चेंडूत 10 धावांची गरज होती. यावेळी जडेजाने षटकार आणि मग शॉर्ट फाईन लेगला चौकार ठोकला होता. यासह चेन्नईने आयपीएल ट्रॉफीवर नाव कोरले होते.

विजयी चौकार ठोकल्यानंतर जडेजाने संपूर्ण स्टेडिमवर आनंदाने पळाला होता आणि नंतर त्याने धोनीला मिठी मारली होती. धोनीनेही त्याला आनंदाने उचलून घेतले होते.

दरम्यान, आता जडेजाने पुन्हा एकदा अहमदाबादमध्ये आल्यानंतर त्या विजयी चौकाराची नक्कल करून दाखवत पुन्हा एकदा आठवणी ताज्या केल्या आहेत. याचा व्हिडिओही चेन्नई सुपर किंग्सने सोशल मीडियावर शेअर केला आहे.

दरम्यान, आता आयपीएल 2024 मध्ये चेन्नई सुपर किंग्स सध्या पाँइंट्स टेबलमध्येच चौथ्या क्रमांकावर आहेत. त्यांनी 11 सामन्यांपैकी 6 विजय मिळवले आहेत, तर 5 पराभव स्विकारले आहेत. त्यामुळे त्यांचे 12 पाँइंट्स आहेत.

चेन्नई यंदाही प्लेऑफमध्ये जागा मिळवण्यासाठी प्रबळ दावेदार आहेत. मात्र गुजरात टायटन्स यंदा संघर्ष करताना दिसत आहेत. गुजरातने 11 सामन्यांपैकी 4 सामन्यातच विजय मिळवला आहे.