Rohit Sharma Shubman Gill : आयपीएल 2023 च्या क्वालिफायर 2 सामन्यात गुजरात टायटन्सने मुंबई इंडियन्सचा 62 धावांनी पराभव केला. गुजरातने सलग दुसऱ्या हंगामात अंतिम फेरीत प्रवेश केला आहे. आता ते चारवेळा आयपीएलवर नाव कोरणाऱ्या चेन्नई सुपर किंग्जशी रविवारी भिडणार आहेत.
शुभमन गिलने 129 धावांची धडाकेबाज खेळी करत हंगामातील आपले तिसरे शतक ठोकले. या शतकी खेळीच्या जोरावर गुजरातने मुंबईसमोर विजयासाठी 234 धावांचे मोठे आव्हान ठेवले होते. मुंबईनेही झुंजार फलंदाजी करत सामन्यात रंगत निर्माण केली होती. तिलक वर्माने 14 चेंडूत 43 धावा चोपल्या. तर सूर्यकुमार यादवने 61 धावांची खेळी केली.
जोपर्यंत सूर्यकुमार यादव क्रीजवर होता तोपर्यंत मुंबईच्या विजयाच्या आशा जिवंत होत्या. मात्र गुजरातचा अनुभवी वेगवान गोलंदाज मोहित शर्माने अवघ्या 10 धावात मुंबईचा निम्मा संघ गारद केला. त्यात सूर्याचा देखील समावेश होता. यानंतर मुंबईचा डाव 171 धावात संपुष्टात आला.
मुंबईच्या पराभवानंतर कर्णधार रोहित शर्माने प्रतिक्रिया दिली. त्याने शुभमन गिलची पाठ थोपटतानाच त्याच्याकडून एक अपेक्षा देखील व्यक्त केली. रोहित म्हणाला की, 'शुभमन गिलने चांगली फलंदाजी केली. खेळपट्टी फलंदाजीला पोषक होती. त्यांनी 20 ते 25 धावा जास्त केल्या. आम्ही पहिल्या हाफपर्यंत सकारात्मक खेळलो. आपल्याला शुभमनला श्रेय द्यावं लागेल. मला आशा आहे की त्याचा फॉर्म असाच रहावा.'
रोहित ग्रीन आणि सूर्याबद्दल म्हणाला, 'ग्रीन आणि सूर्याने चांगली फलंदाजी केली मात्र आम्ही लय गमावली. आम्ही सकारात्मक आणि चांगली लढत देण्याचा प्रयत्न केला. मात्र आम्हाला पॉवर प्लेमध्ये चांगल्या धावा करता आल्या नाहीत. आम्ही गुजरातप्रमाणे एक फलंदाज सामना शेवटपर्यंत घेऊन जाईल अशी अपेक्षा केली होती. खेळपट्टी चांगली होती. सीमारेषा देखील छोट्या होत्या. मात्र गुजरात ज्या प्रकारे खेळली विजयाचे श्रेय त्यांनाच जाते.'
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.