मुंबई : कोणताही मागचा-पुढचा विचार न करता बिनधास्त फलंदाजी कर, असा सल्ला मला फलंदाजीचे प्रशिक्षक कायरन पोलार्ड यांनी दिला होता आणि मी क्षणाचाही विलंब न लावता प्रत्येक चेंडू सत्कारणी लावला, असे मत मुंबई इंडियन्सच्या विजयाचा शिलेदार रोमारिओ शेफर्डने व्यक्त केले.

आयपीएलमधील आपला दुसराच सामना खेळणाऱ्या रोमारिओने रविवारी वानखेडे स्टेडियमवर झंझावात सादर केले. मुंबईच्या डावातील अखेरचे १३ चेंडू शिल्लक असताना तो मैदानात आला आणि फलंदाजीस मिळालेल्या १० चेंडूंत त्याने नाबाद ३९ धावांची खेळी साकार केली. यातील ३२ धावा तर त्याने अखेरच्या षटकात फटकावल्या. त्यामुळे मुंबईला दिल्लीविरुद्धचा हा सामना २९ धावांनी जिंकता आला.

तब्बल ३९० च्या स्टाईक रेटने फटकेबाजी करणाऱ्या रोमारिओसाठी आयपीएल नवीन नाही. २०२२ मध्ये हैदराबाद संघाने ५० लाखांत त्याला आपल्या संघात घेतले होते; परंतु तो तीनच सामने खेळला होता. २०२३ मध्ये तो लखनौ संघात होता; परंतु तेथे त्याला एकही सामना खेळण्याची संधी मिळाली नाही. यंदा मुंबई संघाने त्याला लखनौ संघातून आपल्याकडे ट्रेड केले.

रविवारी साकार केलेल्या खेळीचे श्रेय रोमारिओने पोलार्ड यांना दिले. पहिल्या चेंडूपासून आक्रमण करण्याची पोलार्ड यांची खासियत होती. रोमारिओने त्यांच्याच पावलावर पाऊल टाकून मुंबई इंडियन्ससाठी संधी मिळातच मॅच विनिंग खेळी केली. मी फलंदाजीस जात असताना पोलार्ड यांनी दिलेले प्रोत्साहन मौल्यवान ठरले, असे रोमारिओ म्हणाला.

मी फलंदाजीस गेलो तेव्हा १३ चेंडू शिल्लक होते. त्यामुळे संपूर्ण सपोर्ट स्टाफने दिलेला सल्ला माझ्यासाठी स्पष्ट होता. कोणताही इतर विचार न करता मी प्रत्येक चेंडूवर मोठा फटका मारण्याचा प्रयत्न केला, असे रोमारिओने सांगितले.

माझी खेळी स्फोटक ठरली असली तरी आम्ही स्पर्धेत मिळवलेला हा पहिला विजय त्यापेक्षा मोठा होता. या सामन्याअगोदर आम्ही तळाच्या स्थानावर होतो. त्यामुळे कोणत्याही परिस्थितीत विजय आवश्यक होता. या विजयात सर्वांचे योगदान मोलाचे ठरले, अशीही भावना रोमिरिओने व्यक्त केली.