Ruturaj Gaikwad Record: इंडियन प्रीमियर लीग 2024 स्पर्धेत (IPL) 49 वा बुधवारी (1 मे) सामना चेन्नई सुपर किंग्स विरुद्ध पंजाब किंग्स संघात होत आहे. चेपॉक स्टेडियमवर होत असलेल्या या सामन्यात चेन्नई सुपर किंग्सने कर्णधार ऋतुराज गायकवाडने शानदार अर्धशतक करत मोठे विक्रम केले आहेत.

त्याने या सामन्यात 48 चेंडूत 62 धावांची खेळी केली. या खेळीत त्याने 5 चौकार आणि 2 षटकार मारले. त्यामुळे त्याने आयपीएलच्या चालू हंगामात 500 धावांचा टप्पा पार केला. याबरोबरच त्याने आयपीएल 2024 मध्ये सर्वाधिक धावा करणाऱ्या फलंदाजांच्या यादीत विराट कोहलीला मागे टाकत अव्वल क्रमांक पटकावला आहे.

सध्या 1 मे पर्यंत आयपीएल 2024 मध्ये ऋतुराजने 10 सामन्यांत 63.63 च्या सरासरीने 1 शतक आणि 4 अर्धशतकांसह 509 धावा केल्या आहेत.

तसेच विराटच्या नावावर 10 सामन्यांत 71.43 च्या सरासरीने 1 शतक आणि 4 अर्धशतकांसह 500 धावा आहेत. त्यामुळे सध्या हंगामात सर्वाधिक धावा करण्यासाठी देण्यात येणारी ऑरेंज कॅप ऋतुराजकडे आहे.

धोनीचा विक्रमही टाकला मागे

दरम्यान, ऋतुराजने आयपीएलच्या 17 व्या हंगामात 500 धावा पार केल्या असल्याने त्याच्या नावावर चेन्नईचा कर्णधार म्हणून मोठा विक्रम झाला आहे. तो एका आयपीएल हंगामात 500 धावा करणारा चेन्नईचा पहिलाच कर्णधार ठरला आहे.

ऋतुराजने एका आयपीएल हंगामात सर्वाधिक धावा करणाऱ्या चेन्नईच्या कर्णधारांच्या यादीत एमएस धोनीला मागे टाकत अव्वल क्रमांक पटकावला आहे. धोनीने चेन्नईचा कर्णधार म्हणून 2013 च्या आयपीएल हंगामात 461 धावा केल्या होत्या. हा त्याचा आयपीएल कारकिर्दीत धावांच्या बाबतीत सर्वोत्तम हंगामही ठरला होता.

एका आयपीएल हंगामात सर्वाधिक धावा करणारे चेन्नईचे कर्णधार

• 509 धावा - ऋतुराज गायकवाड, 2024 (10 सामने)*

• 461 धावा - एमएस धोनी, 2013 (18 सामने)

• 455 धावा - एमएस धोनी, 2018 (16 सामने)

• 416 धावा - एमएस धोनी, 2019 (15 सामने)

चेन्नईचे पंजाब समोर 163 धावांचे आव्हान

बुधवारी ऋतुराजच्या अर्धशतकाच्या जोरावर प्रथम फलंदाजी करताना 20 षटकात 7 बाद 162 धावा केल्या. त्यामुळे आता विजयासाठी पंजाबसमोर 163 धावांचे लक्ष्य आहे.