Shikhar Dhawan Wicket: इंडियन प्रीमियर लीग 2024 स्पर्धेतील 23 व्या सामन्यात सनरायझर्स हैदराबाद संघाने पंजाब किंग्सविरुद्ध मंगळवारी (9 एप्रिल) 2 धावांनी रोमांचक विजय मिळवला. याच सामन्यात भुवनेश्वर कुमारच्या गोलंदाजीवर हेन्रिक क्लासेनने पंजाबचा कर्णधार शिखर धवनला केलेल्या यष्टीचीतने सर्वांचे लक्ष वेधले.

दरम्यान, या विकेटसाठी भुवनेश्वर कुमारने रणनीती आखल्याचे त्याने सामन्यानंतर सांगितले. या सामन्यात हैदराबादने पंजाबसमोर 183 धावांचे आव्हान दिले होते. या आव्हानाचा पाठलाग करताना पंजाबने 3 षटकातच 11 धावांवर 2 विकेट्स गमावल्या होत्या.

त्यानंतर शिखर सॅम करनसह पंजाबचा डाव सावरण्याचा प्रयत्न करत होता. परंतु, पाचव्या षटकातील चौथा चेंडू ताशी 140 किमी वेगाने भुवनेश्वरने गुड लेंथवर टाकला, ज्यावर शिखरने पुढे येऊन शॉट खेळण्याचा प्रयत्न केला.

परंतु, त्याला योग्यप्रकारे शॉट खेळला आला नाही आणि चेंडू यष्टीरक्षक क्लासेनच्या हातात गेला. क्लासेननेही वेळ न दवडता शिखर क्रिजमध्ये परण्यापूर्वीच स्टंपवरील बेल्स उडवले. त्यामुळे शिखरला 16 चेंडूत 14 धावा करून माघारी परतावे लागले.

या विकेटबद्दल सामन्यानंतर भुवनेश्वर कुमारने सांगितले, 'मी क्लासेनला पुढे येण्यास सांगितले होते, कारण शिखर बाहेर येऊन शॉट खेळण्याचे प्रयत्न करत होता आणि मला ऑफ विकेटला गोलंदाजी करून त्याला बाद करण्याचा प्रयत्न करायचा होता. मला वाटते यापूर्वी माझ्या चेंडूवर एखादा फलंदाज जेव्हा मी पुणे वॉरियर्सकडून खेळलो असेल, तेव्हा यष्टीचीत झाला असेल.'

दरम्यान, शिखर बाद झाल्यानंतरही सॅम करन (29) आणि सिकंदर रझा (28) यांनी खेळपट्टीवर स्थिरावल्यानंतर विकेट्स गमावल्या. पण अखेरीस शशांक सिंग आणि आशुतोष शर्मा यांनी केलेल्या आक्रमणामुळे पंजाबने विजय मिळवण्याचा प्रयत्न केला होता. मात्र २ धावा त्यांना कमी पडल्या.

शशांक 25 चेंडूत 46 धावांवर नाबाद राहिला, तर आशुतोष 15 चेंडूत 33 धावा करून नाबाद राहिला. पंजाबला 20 षटकात 6 बाद 180 धावा करता आल्या.

तत्पुर्वी सनरायझर्स हैदराबादने 20 षटकात 9 बाद 182 धावा केल्या होत्या.