IPL 2024, GT vs PBKS: इंडियन प्रीमियर लीग 2024 स्पर्धेत 17 वा सामना गुरुवारी गुजरात टायटन्स विरुद्ध पंजाब किंग्स संघात पार पडला. या सामन्यात पंजाबने एक चेंडू राखून 3 विकेट्सने रोमांचक विजय मिळवला.

या सामन्यात गुजरातने 200 धावांचे लक्ष्य पंजाबला दिले होते. या लक्ष्याचा पाठलाग पंजाबने अखेरच्या षटकात पूर्ण केला. दरम्यान, या सामन्यात गुजरातच्या क्षेत्ररक्षकांकडून काही झेलही सुटले, याचबद्दल कर्णधार शुभमन गिलनेही सामन्यानंतर भाष्य केले.

गिल म्हणाला, 'काही झेल सुटले. अशा चांगल्या खेळपट्टीवर जर तुम्ही झेल सोडले, तर विजय कठीण होऊन जातो. अशा परिस्थितीत धावांचा बचाव करणे अवघड असते. नवीन चेंडूवर फलंदाजांना संघर्ष करावा लागत होता.

'अशा काही जागा आहेत, जिथे सुधारणेची गरज आहे. मला वाटते २०० धावा पुरेशा होत्या आणि आमचे 15व्या षटकापर्यंत सामन्यात पारडेही जड होते.'

'जेव्हा तुम्ही झेल सोडता, तेव्हा तुम्ही अडचणीत येता. नळकांडेने गेल्या सामन्यात ज्याप्रकारे गोलंदाजी केली होती, त्यामुळे आम्हाला त्याला शेवटच्या षटकात गोलंदाजी द्यायची होती. हेच आयपीएल आहे, तुम्ही ज्यांना पाहिलेही नसते असे खेळाडू येऊन सामना जिंकून देतात.

या सामन्यात पंजाबला 200 धावांचा लक्ष्य पार करून देण्यात शशांक सिंगने मलोचा वाटा उचलला. त्याने 29 चेंडूत 6 चौकार आणि 4 षटकार मारत नाबाद 61 धावांची खेळी केली. तसेच त्याने अशुतोष शर्माबरोबर 7 व्या विकेटसाठी 43 धावांची महत्त्वपूर्ण भागीदारी केली. अशुतोषने 17 चेंडूत 31 धावांची खेळी केली. गुजकातकडून नूर अहमदने 2 विकेट्स घेतल्या.

तत्पुर्वी, गुजरातने 20 षटकात 4 बाद 199 धावा केल्या होत्या. गुजरातकडून कर्णधार शुभमन गिलने 48 चेंडूत 6 चौकार आणि 4 षटकारांसह नाबाद 89 धावांची खेळी केली. तसेच साई सुदर्शनने 19 चेंडूत 33 धावांची खेळी केली. पंजाबकडून कागिसो रबाडाने 2 विकेट्स घेतल्या.