Rajasthan Royals News: इंडियन प्रीमियर लीग 2024 (IPL 2024) स्पर्धेला शुक्रवारी (22 मार्च) सुरुवात झाली. या स्पर्धेला सुरुवात होण्याच्या अगदी काही तास आधी राजस्थान रॉयल्स संघात मुंबईच्या तनुष कोटियनची निवड झाल्याची घोषणा झाली.

तनुषला फिरकीपटू ऍडम झाम्पाच्या जागेवर संधी देण्यात आली आहे. आयपीएल 2024 स्पर्धा सुरु होण्यासाठी दोनच दिवस राहिले असताना झाम्पाने अचानक माघार घेतली.

झाम्पाला आयपीएल 2024 हंगामासाठी राजस्थान रॉयल्सने संघात कायम केले होते. परंतु, त्याने वैयक्तिक कारणाने या हंगामातून माघार घेतली आहे.

झाम्पा 2023 वर्ल्डकपपासून सातत्याने ऑस्ट्रेलियाकडून मर्यादीत षटकांच्या क्रिकेटमध्ये खेळत आहे. पण आता त्याने आयपीएलच्या 17 व्या हंगामातून माघार घेतल्याने त्याच्या जागेवर तनुषची राजस्थान रॉयल्सने संघात निवड केली. राजस्थानने तनुषला 20 लाखांच्या किमतीत संघात सामील करून घेतले.

त्याच्या निवडीनंतर राजस्थान रॉयल्सने त्याचा एक खास व्हिडिओ सोशल मीडियावर शेअर केला आहे.

या व्हिडिओमध्ये तो त्याच्या वडिलांशी बोलताना दिसत आहे. त्याने वडिलांना व्हिडिओ कॉल केलेला दिसत असून यावेळी त्याने राजस्थान रॉयल्सची जर्सी घातलेली आहे.

या व्हिडिओ कॉलवर तनुष आणि त्याच्या वडिलांमध्ये मराठीत संभाषण झाले. त्याचे वडील त्याला राजस्थान रॉयल्सच्या जर्सीतील फोटो पाठव असंही सांगताना दिसत आहेत. या व्हिडिओच्या बॅकग्राऊंडला राजस्थान रॉयल्सने 'खेळ मांडला' हे गाणे वाजत आहे. या व्हिडिओला चाहत्यांकडून मोठ्याप्रमाणात पसंती मिळाली आहे.

तनुष कोटियनने देशांतर्गत क्रिकेटमध्ये मुंबईसाठी शानदार कामगिरी केली आहे. त्याने सईद मुश्ताक अली टी20 ट्रॉफी आणि रणजी ट्रॉफी 2023-24 स्पर्धेत चांगली कामगिरी केली. तो रणजी ट्रॉफी 2023-24 हंगामातील सर्वोत्तम खेळाडूही ठरला. त्याने या हंगामात 502 धावा आणि 29 विकेट्सही घेतल्या आहेत.