Twitter Blue Ticks : भारतातील स्टार खेळाडू सचिन तेंडुलकर, विराट कोहली आणि ऑलिम्पिक पदक विजेती बॅडमिंटनपटू पी.व्ही. सिंधूने ट्विटरवरील आपली ब्लू टिक गमावली आहे. या ब्लू टिकमुळे स्टार आणि सेलिब्रेटी लोकांचे हे अधिकृत अकाऊंट आहे याची ओळख व्हायची. मात्र आता हा ब्लू चेकमार्क हटवण्यात आला आहे.

ट्विटरने यापूर्वी त्यांची ब्लू टिक ही पत्रकार, सरकारी अधिकारी आणि सेलिब्रेटी लोकांना फुकटात दिली होती. सोशल मीडियावरील माहिती अधिक पारदर्शता असावी, स्पॅम आणि सेलिब्रेटींच्या तोतया सोशल मीडिया अकाऊंट्सवर अंकुश रहावा हा याचा उद्येश होता.

मात्र प्रसिद्ध उद्योगपती एलॉन मस्क यांनी ट्विटर खरेदी केल्यानंतर गेल्या वर्षी आता ब्लू टिकसाठी महिन्याला पैसे द्यावे लागतील असे जाहीर केले होते. जे पैसे भरणार नाहीत त्यांची ब्लू टिक काढून घेण्यात येईल सांगितले होते. त्याप्रमाणे गुरूवारपासून ही ब्लू टिक हटवण्यात आली आहे.

ट्विटरने आपल्या अधिकृत अकाऊंटवरून बुधवारी ट्विट केले, 'उद्या 4/20 आम्ही ऐतिहासिक अधिकृत अकाऊंटचा चेकमार्क हटवत आहोत.'

विशेष म्हणजे सचिन तेंडुलकर, विराट कोहली यांच्याप्रमाणेच एमएस धोनी, रोहित शर्मा, सायना नेहवाल, नीरज चोप्रा, बजरंग पुनिया, विनेश फोगाट, निखत झरीन, सानिया मिर्झा, सुनिल छेत्री पीआर श्रीजेश यांची देखील ब्लू टिक ट्विटरने हटवली आहे.

याचबरोबर जागतिक स्तरावरील स्टार खेळाडू रॉजर फेडरर, राफेल नदाल, ख्रिस्तियानो रोनाल्डो, एम्बाप्पे, स्टेफन कुरी यांच्या अकाऊंटची देखील ब्लू टिक हटवण्यात आली आहे.

आता इथून पुढे वैयक्तिक आणि संस्थेची ट्विटर अकाऊंट ब्लू टिकचे सबस्क्रिप्शन घेतील त्यांनाच ही अधिकृत अकाऊंटची टिक मिळणार आहे. ट्विटरची अधिकृत अकाऊंटसाठीचे सबस्क्रिप्शन हे वेबसाठी 650 आणि मोबाईलासाठी 900 रूपयांना मिळणार आहे.

(Sports Latest News)

हेही वाचा : संतुलित आहारातून रोखा फॅटी लिव्हरचा आजार