IPL 2024 Toss Fixing MI vs KKR : आयपीएल 2024 चा 51 वा सामना शुक्रवारी मुंबई इंडियन्स आणि कोलकाता नाईट रायडर्स यांच्यात वानखेडे स्टेडियमवर खेळला गेला. या सामन्यात चांगली कामगिरी करत केकेआर संघाने हंगामातील सातवा विजय संपादन केला.

केकेआरने दिलेल्या 170 धावांच्या लक्ष्याचा पाठलाग करताना मुंबईचा संपूर्ण संघ 18.5 षटकांत 145 धावांत गारद झाला. आणि कोलकाता संघाने 24 धावांनी शानदार विजय मिळवला. पण या सामन्यादरम्यान पुन्हा एकदा टॉस चर्चेत आला. नाणेफेकीच्या वेळी टॉस कॅमेऱ्यात न दाखवल्याने लोकांनी प्रश्न उपस्थित केले आहेत.

खरंतर सामन्यादरम्यान मुंबई इंडियन्सचा कर्णधार हार्दिक पांड्याने टॉस उंच हवेत फेकला, त्यानंतर श्रेयस अय्यरने हेड मागितले परंतु मॅच रेफरी म्हणाला की टेल. आणि हार्दिकने नाणेफेक जिंकली.

मात्र, टॉसपर्यंत कॅमेरा पोहोचण्याआधीच मॅच रेफरीने निर्णय दिला, जे पाहून लोकांना टॉस फिक्सिंगचा संशय आला. आयपीएलने शेअर केलेल्या व्हिडिओमध्ये लोकांनी हे आरोप केले आहेत.

याआधी मुंबई इंडियन्स आणि रॉयल चॅलेंजर्स बंगळुरू यांच्यात खेळल्या गेलेल्या सामन्यातही असाच प्रकार पाहायला मिळाला, जेव्हा सामनाधिकारी जवागल श्रीनाथ यांनी टॉस पलटवून मुंबईला नाणेफेक जिंकायला लावल्याचा आरोप करण्यात आला. तेव्हा त्या सामन्याच्या नाणेफेकीचा व्हिडिओ सोशल मीडियावर व्हायरल झाला होता.

यामध्ये मुंबई इंडियन्सचा कर्णधार हार्दिक पांड्याने त्याच्या डोक्यावरून टॉस लांब फेकला जो त्याच्या मागे पडला. त्या सामन्यात रेफ्री जवागल श्रीनाथ टॉस उचलण्यासाठी मागे गेले. इतकेच नाही तर तो व्हिडिओ पाहिल्यानंतर लोकांनी श्रीनाथवर टॉस फिक्स केल्याचा आरोपही केला.

त्यानंतर चिन्नास्वामी स्टेडियमवर बेंगळुरूचा हैदराबादशी सामना झाला, तेव्हा नाणेफेकदरम्यान फॅफ डू प्लेसिस पॅट कमिन्सला सांगत होता की मुंबई इंडियन्सविरुद्धच्या सामन्यादरम्यान रेफ्री जवागल श्रीनाथ यांनी नाणेफेकवेळी टॉस उचलला आणि तो फिरवला. तो हातवारे करत हे कसे झाले सांगत होता. आणि कमिन्सही आश्चर्याने त्याचे बोलणे ऐकत होता.