Kane Williamson ODI World Cup 2023 : एकदिवसीय विश्वचषक स्पर्धा यावर्षी ऑक्टोबर-नोव्हेंबर दरम्यान भारतात खेळली जाणार आहे. ही मोठी स्पर्धा लक्षात घेऊन सर्व संघ आयपीएलमध्ये खेळणाऱ्या आपल्या खेळाडूंच्या फिटनेसवर लक्ष ठेवून आहेत.

आयपीएल 2023 मध्ये फक्त तीन सामने खेळले गेले आहेत, परंतु त्याच दरम्यान एक वाईट बातमी समोर येत आहे. सीझन 16च्या पहिल्या सामन्यादरम्यान एक धडाकेबाज खेळाडू जखमी झाला होता. या खेळाडूला आता एकदिवसीय विश्वचषक 2023 मधून बाहेर पडण्याचा धोका आहे.

गुजरात टायटन्ससाठी आयपीएलच्या सुरुवातीच्या सामन्यात गुडघ्याला दुखापत झालेल्या केन विल्यमसनच्या विश्वचषकासाठी न्यूझीलंडमध्ये त्याच्या उपलब्धतेबाबत चिंता वाढली आहे. चेन्नई सुपर किंग्जविरुद्ध क्षेत्ररक्षण करताना केन विल्यमसनला दुखापत झाली होती.

केन विल्यमसन या दुखापतीमुळे आयपीएल 2023 च्या संपूर्ण हंगामातून बाहेर पडला आहे. त्याचबरोबर 2023 च्या वनडे वर्ल्ड कपमधूनही बाहेर जाण्याचा धोका आहे.

अहमदाबादच्या नरेंद्र मोदी स्टेडियमवर चेन्नई सुपर किंग्ज विरुद्धच्या सामन्यात चेन्नईच्या डावादरम्यान विल्यमसनला सीमारेषेवर एक चौकार रोखण्याच्या प्रयत्नात दुखापत झाली. तो वेदनेने ओरडत होता. नंतर फिजिओ आले काही वेळाने खांद्याचा आधार घेऊन त्याला मैदानाबाहेर काढले. त्याचवेळी त्याच्या जागी साई सुदर्शनला इम्पॅक्ट प्लेयर खेळाडू म्हणून घेण्यात आले.