भारतीय संघात स्थान मिळवण्यासाठी संघर्ष करत असलेला फिरकीपटू कुलदीप यादव (Kuldeep Yadav) कोविड-19 लशीमुळे (coronavirus vaccine) अडचणीत सापडण्याची शक्यता आहे. प्रोटोकॉलचे नियम धाब्यावर बसवून लसीकरणावेळी कुलदीपला व्हिआयपी ट्रिटमेंट कशी मिळाली, हा मुद्दा आता चर्चेत आलाय. याप्रकरणात तपासाचे आदेश प्रशासनाकडून देण्यात आले आहेत.

कुलदीप यादवने शनिवार लशीचा पहिला डोस घेतला. लस घेतानाच एक फोटो त्याने सोशल मीडियाच्या माध्यमातून शेअर केला. फोटो शेअर करुन देशवासिंयाना लस घेण्याचे आवाहन त्याने केले. पण फोटोमध्ये तो लॉनमध्ये लस घेत असल्याचे दिसल्यामुळे अनेक प्रश्न उभे राहिले. प्रोटोकॉलचे उल्लंघन करुन त्याला लस कशी दिली गेली, असा प्रश्न उपस्थितीत करण्यात येतोय. कानपूरच्या जिल्हाधिकाऱ्यांनी याप्रकरणाचा तपास करण्याचे आदेश दिले आहेत.

एका अधिकाऱ्याने नाव न सांगण्याच्या अटीवर दिलेल्या माहितीनुसार, कुलदीपला गोविंद नगर स्थित जागेश्वर रुग्णालयात लशीचा पहिला डोस घ्यायचा होता. परंतु कानपुरमधील शासकीय गेस्ट हाउसच्या लॉनमध्येच त्याला लस टोचण्यात आली. पंतप्रधान नरेंद्र मोदी आणि अन्य राज्यातील मुख्यमंत्र्यांनीही लसीकरण केंद्रावर जाऊन लस घेतली असताना कुलदीपला व्हिआयपी ट्रिटमेंट का? असा प्रश्न विचारण्यात येत आहे.