Kapil Dev Statement Over IPL Pressure : भारताचे दिग्गज माजी कर्णधार कपिल देव यांनी सध्याच्या खेळाडूंवर कडक शब्दात टीका केली आहे. जेव्हापासून टी 20 क्रिकेटचा उदय झाला आहे तेव्हापासून क्रिकेट खूपच दमछाक करणारे झाले आहे. अनेक खेळाडू तीनही क्रिकेट फॉरमॅट खेळत असल्याने त्यांच्यावर शारीरिक आणि मानसिक ताण वाढला आहे. याचबाबत कपिल देव यांनी आपले सडेतोड मत व्यक्त केले.

कपिल देव चॅम्पियन्स ऑफ आकाश 2022 या कार्यक्रमाचे प्रमुख पाहुणे होते. हा कार्यक्रम आकाश बायजू या शैक्षणिक संस्थेने आयोजित केला होता. यावेळी कपिल देव सध्याचे स्पर्धात्मक जग आणि त्यांचे खेळत असतानाचे जुने दिवस यांची तुलना केली.

कपिल देव म्हणाले की, 'माझी खेळण्याची तीव्र इच्छा होती. हा महत्वाचा फरक होता. मी जरा विषय बदलतोय. मी सध्या टीव्हीवर सातत्याने ऐकतोय, लोक म्हणत आहेत की आमच्यावर खूप दबाव आहे. आम्ही आयपीएल खेळत आहोत. तेथे खूप दबाव असतो. यावर मी एकच गोष्ट सांगू इच्छितो खेळू नका! दबाव काय असतो जर तुम्हाला खेळण्याची तीव्र इच्छा असेल तर तेथे दबाव असूच शकत नाही.'

कपिल देव पुढे म्हणाले की, 'दबाव, डिप्रेशन हे अमेरिकेतून आलेले शब्द आहेत. मला हे कधी समजलेच नाहीत. मी शेतकरी कुटुंबातून येतो. आम्ही आनंदासाठी खेळलो. जिथे आनंद आहे तिथे दबाव असूच शकत नाही.'