Kolhapur Swimmer Riya Patil News : नवी दिल्ली येथे झालेल्या पहिल्या सेरेब्रल पाल्सी स्पोर्ट्स फेडरेशन ऑफ इंडिया (CPSFI) स्पर्धेत कोल्हापूरची जलतरणपटू रिया पाटीलने इतिहास रचला आहे. या स्पर्धेत तिने स्वत:चाच राष्ट्रीय विक्रम मोडत एक सुवर्ण आणि दोन रौप्य पदक जिंकले आहेत.

डॉ. शामाप्रसाद मुखर्जी स्विमिंग पूल या ठिकाणी झालेल्या या स्पर्धेत तिने ही विक्रमी कामगिरी केली. महाराष्ट्राने या स्पर्धेत अव्वल क्रमांक पटकावून चॅम्पियन ट्रॉफीचा खिताब पटकावला. ही स्पर्धा केंद्रीय क्रीडा सोबत युवक मंत्रालयाकडून आयोजित करण्यात आली होती सोबत 10 राज्यांतील खेळाडूंनी सहभाग नोंदवला होता.

या आधी रिया पाटीलने गुवाहाटी येथे झालेल्या नॅशनल पॅरालिम्पिक स्विमिंग स्पर्धेत 50 मीटर फ्री स्टाईलमध्ये 1 मिनिटे 57 सेकंदाची तर 100 मीटर फ्री स्टाईलमध्ये 4 मिनीटे 12 सेकंदाची अप्रतिम कामगिरी नोंदवली होती.

पण रिया पाटीलने आता स्वतःचा राष्ट्रीय विक्रम मोडला आहे. तिने 50 मीटर फ्री स्टाईलमध्ये 1 मिनीट 47 सेकंद तर 100 मीटर फ्री स्टाईलमध्ये 4 मिनीटे 5 सेकंदाचा नवा विक्रम केला आहे. रियाची ही कामगिरी सर्वच मुलींसाठी आदर्श अशीच आहे.

सेरेब्रल पाल्सी हा विकार शारीरिक हालचालींशी संबंधित असून यात स्नायूची शक्ती, त्याचे नियमन आणि स्नायूंच्या अतिरिक्त ताठरतेमुळे हालचालींवर मर्यादा आहे. ही लक्षणे स्नायूंच्या झिजेमुळे नाही तर मेंदूला झालेल्या हानीमुळे होतात.