Maharashtra Kesari Kushti 2023 : स्व. मामासाहेब मोहोळ क्रीडानगरीत सुरू असलेल्या महाराष्ट्र राज्य कुस्तीगीर परिषदेच्या अस्थायी समितीच्या मान्यतेने ६५ व्या राज्य अजिंक्यपद व महाराष्ट्र केसरी किताब कुस्ती अधिवेशनाचे आयोजन संस्कृती प्रतिष्ठान व पुण्याचे माजी महापौर मुरलीधर मोहोळ यांच्या वतीने करण्यात आले आहे.

महाराष्ट्र केसरी कुस्ती स्पर्धेत यंदाची मानाची गदा शिवराज राक्षेने पटकावली आहे. अंतिम सामन्यात शिवराज राक्षेने सोलापूरच्या महेंद्र गायकवाडला काही मिनिटात चीतपट केलं.

माती विभागातील सोलापूरचा सिकंदर शेख आणि पुण्याचा महेंद्र गायकवाड यांच्यात उपांत्य सामना पार पडला. हा सामना अतिशय थरारक असा बघायला मिळाला. अखेर महेंद्र गायकवाडचा विजय झाला. पण सोशल मीडियावर सिकंदरवर अन्याय झाला याची जोरदार चर्चा रंगली आहे.

सिकंदर शेख आणि महेंद्र गायकवाड यांनी आधी सावध पवित्रा घेतला. सावध पवित्र्यानंतर महेंद्र गायकवाडने तीन मिनिटांच्या पहिल्या फेरीत एक गुण घेत आघाडी मिळवली. महेंद्रने आघाडी घेतल्यानंतर सिकंदरने प्रतीडाव टाकत दोन गुण पटकाले. पहिल्या फेरीत सिकंदर शेख 2-1 गुणांनी आघाडी घेतली.

पुढच्या फेरीत महेंद्र गायकवाडने 4 गुण मिळवत आघाडी पिछाडी भरून काढत सिकंदर शेखवर 5-4 अशी आघाडी घेतली. पण महेंद्र गायकवाडने लावलेली बाहेरील डांग हा डाव ही व्यवस्थीत झाला नव्हता सिकंदर डेन्जर पोझिशन ला नव्हता मग चार गुण कशाचे दिले गेले? असे प्रश्न सोशल मीडियावर विचारल्या जात आहे.

सिकंदर आणि महेंद्र यांच्यात एक एक गुणासाठी चढाओढ सुरू असताना शेवटच्या मिनिटाला दोन्ही पैलवानांनी गुण मिळवण्यासाठी चांगलीच झटापाट सुरू केली होती. एकमेकांवर पकड मिळवण्यासाठी दोन्ही कुस्तीपटू झुंजत होते. अखेर महेंद्र गायकवाडने एक गुण घेत कुस्ती जिंकली.

सोशल मीडियावर एका चाहत्याने पोस्ट करत लिहिले की, जर निर्णय बरोबर दिले असते तर , सिकंदर शेख विजयी झाला असता. फक्त किताब जाईल दोघांपैकी एकाकडे पण खरा महाराष्ट्र केसरी फक्त सिकंदर शेखच आहे. पंचांच्या एका चुकीमुळे आज पूर्ण देशाच्या कुस्तीवर राज्य करणारा सिकंदर शेख आज महाराष्ट्र केसरी होऊ शकला नाही.