सातारा : काल (शुक्रवार) अवकाळी पावसामुळं (Heavy Rain in Satara) झालेली पडझड सावरत आज (शनिवार) सकाळी आठ वाजता महाराष्ट्र केसरी स्पर्धेतील माती आणि गादी प्रकारामधील विविध वजनी गटातील कुस्ती स्पर्धांना आखाडा पूजनानं सुरुवात झालीय. या गटातील कुस्त्या संपल्यानंतर महाराष्ट्र केसरी स्पर्धेतील (Maharashtra Kesari Competition) उपांत्य फेरीमधील कुस्त्या घेण्यात येणार असून अंतिम लढत सायंकाळी होणार आहे.

सातारा शहरात काल अवकाळी पावसानं जोरदार हजेरी लावली होती. पावसामुळं शाहू स्टेडियम (Shahu Stadium) येथील कुस्ती मैदानाचं मोठं नुकसान झाल्यानं महाराष्ट्र केसरी कुस्ती स्पर्धा (Maharashtra Kesari Wrestling Competition) स्थगित करण्यात आल्याची माहिती महाराष्ट्र राज्य कुस्तीगीर परिषदेचे सरचिटणीस प्रा. बाळासाहेब लांडगे (Balasaheb Landage) यांनी दिली होती. मात्र, आज पुन्हा कुस्ती स्पर्धेला प्रारंभ झाला आहे.

मागील चार दिवसांपासून तापमानाचा चढा पारा, सकाळपासूनच जाणवणारी उन्हाची तीव्रता, दिवसभर कडक ऊन आणि उकाडा यामुळं अंगाची लाही लाही होत होत असताना काल (शुक्रवार) दुपारी सातारा शहर परिसरात जोरदार वादळी वाऱ्यासह पाऊस झाला. या पावसानं एकूण किती नुकसान झाले याची माहिती अद्याप मिळालेली नाही. परंतु, या पावसानं महाराष्ट्र केसरी कुस्ती स्पर्धा मात्र स्थगित कराव्या लागली होती. अचानक आलेल्या पावसामुळं ‘महाराष्ट्र केसरी’ स्पर्धेचा लाईटचा मंडप कोसळला, आखाड्यातील माती वाहून गेली. मॅट भिजले, स्टेडियममध्ये पाणी साठलं होतं. यामुळं स्पर्धा पुढील निर्णयापर्यंत स्थगित करण्यात आली होती.