पाचव्यांदा चॅम्पियन्स लीगवर आपले नाव करणाऱ्या रिअल माद्रिदचा (Real Madrid) कर्णधार मार्सोलो (Marcelo) आपला 16 वर्षाचा रिअल माद्रिद सोबतचा प्रवास आता संपवण्याची शक्यता आहे. ब्राझीलचा मार्सेलो हा रिअर माद्रिदचा 120 वर्षातला सर्वात डेकोरेटेड प्लेअर आहे. त्याने नुकताच चॅम्पियन्स लीगच्या (Champions League) फायनलमध्ये लिव्हरपूलचा 1-0 असा पराभव करत आपली 25 वी ट्रॉफी उंचावली होती. मार्सेलोला यंदाच्या हंगामात फार काळ खेळण्याची संधी मिळाली नाही. त्याला 2021 - 22 च्या हंगामात लीग स्टेजमध्ये 12 वेळा खेळण्याची संधी मिळाली.

रिअल माद्रिद सोडताना मार्सेलो म्हणाला की, 'आजचा दिवस दुःखाचा नाही तर आनंदाचा आहे. आम्ही पुन्हा एकदा जगातील सर्वोत्तम चॅम्पियनशिप जिंकली आहे. मला स्वतःचा खूप अभिमान आहे. माझ्या कुटुंबीयांना देखील माझा अभिमान आहे. आम्ही सर्वांनी अनेक जादुई रात्री एकत्र जगल्या आहेत. मला तुम्हाला एक गोष्ट सांगायची आहे. माद्रिदचे भविष्य हे खूप चांगले आहे. त्यांच्याकडे चांगले युवा खेळाडू आहे. हाला माद्रिद.' मार्सेलो पुढे म्हणाला की, माझे आणि रिअर माद्रिदचे नाते संपलेले नाही. भविष्यात कदाचित मी वेगळ्या भुमिकेत क्लबशी जोडला जाऊ शकतो.

34 वर्षाच्या मार्सेलोने रिअल माद्रिदचे जवळपास 500 पेक्षा जास्त सामन्यात प्रतिनिधित्व केले आहे. त्याने सर्गियो रोमासकडून नेतृत्वाची धुरा देखील आपल्या खांद्यावर घेतली होती. रोमास गेल्या वर्षी पॅरिस सेंट जर्मनकडे गेला होता. मार्सेलोने 2007 मध्ये रिअल माद्रिदकडून पदार्पण केले होते.