Naseem Shah IND vs PAK : आशिया कप 2023 मधील सुपर 4 सामन्यात भारताने पाकिस्तानचा 228 धावांनी पराभव केला. भारताकडून पाकिस्तानचा वनडे क्रिकेटमध्ये झालेला हा सर्वात मोठा पराभव होता. त्यानंतर श्रीलंकेनेही पाकिस्तानला पराभवाची धूळ चारत त्यांचे आशिया कपची फायनल खेळण्याचे मनसुबे उधळून लावले.

पाकिस्तान आणि भारत यांच्यातील सामन्यात पाकिस्तान पराभूतच झाला नाही तर त्यांना दोन मोठे धक्के देखील बसले. त्यांचे दोन अव्वल वेगवान गोलंदाज हारिस रऊफ आणि नसीम शाह हे दुखापतग्रस्त झाले. त्यांना श्रीलंकेविरूद्धचा सामना देखील गमावावा लागला. आता नसीम शाह हा भारतात होणाऱ्या वर्ल्डकपला देखील मुकणार असल्याची माहिती मिळत आहे.

नसीम शाह वर्ल्डकपमधील सुरूवातीचे काही सामने मुकेल असे बाबर आझमने सांगितले होते. मात्र त्याच्या खांद्याला झालेली दुखापत ही गंभीर स्वरूपाची असल्याचे आढळून आले आहे. त्यामुळे तो संपूर्ण वर्ल्डकपला मुकण्याची दाट शक्यता आहे.

इएसपीएन क्रिकइन्फोने दिलेल्या वृत्तानुसार नसीमचे दुबईत झालेल्या स्कॅनमध्ये त्याच्या खांद्याला जबर दुखापत झालेली आहे. तो 2023 चा उर्वरित हंगाम मुकण्याची शक्यता वर्तवण्यात आली आहे. मात्र असे असले तरी पाकिस्तान क्रिकेट बोर्ड सेकंड ओपिनियन घेणार आहे.

भारत - पाकिस्तान सामन्यावेळी 46 व्या षटकात नसीमने मैदान सोडले होते. त्यानंतर त्याला आशिया कपच्या अर्वरित सामन्याला देखील मुकावे लागले. नसीम हा वर्ल्डकप पाठोपाठ ऑस्ट्रेलियाविरूद्धच्या कसोटी मालिकेला देखील मुकणार आहे.

झमान खान घेणार नसीमची जागा?

नसीम जर संपूर्ण वर्ल्डकपला मुकला तर पाकिस्तान आपल्या संघात झमान खानचा समावेश करण्याची शक्यता आहे. या वेगवान गोलंदाजाने श्रीलंकेविरूद्धच्या सामन्यात चांगले पदार्पण केले होते. त्याने शेवटच्या षटकात जवळपास 8 धावा डिफेंड केल्या होत्या.

पाकिस्तान भारतात होणाऱ्या वर्ल्डकपमध्ये आपली मोहीम 6 ऑक्टोबर पासून सुरू करणार आहे. त्यांचा पहिला सामना नेदरलँडविरूद्ध होणार आहे. त्यांचा भारताविरूद्धचा सामना हा 14 ऑक्टोबरला अहमदाबाद येथे होणार आहे.

(Sports Latest News)