बेलग्रेड : टोकियो ऑलिंपिकमध्ये ब्राँझपदक पटकावणाऱ्या भारताच्या बजरंग पुनिया याला जागतिक कुस्ती अजिंक्यपद स्पर्धेमध्ये निराशेचा सामना करावा लागला. उपांत्यपूर्व फेरीत त्याला पुरुष विभागाच्या ६५ किलो वजनी गटाच्या लढतीत अमेरिकेच्या यिआन्नी डायकोमिहालीस याच्याकडून पराभव पत्करावा लागला. त्यामुळे सुवर्णपदक जिंकण्याच्या शर्यतीमधून त्याला बाहेर यावे लागले.

बजरंग याने याआधी २०१३ मधील जागतिक स्पर्धेमध्ये ब्राँझपदक, २०१८ मध्ये जागतिक स्पर्धेमध्ये रौप्यपदक आणि २०१९ मधील जागतिक स्पर्धेमध्ये ब्राँझपदक पटकावले होते. त्यानंतर टोकियो ऑलिंपिकमध्येही ब्राँझपदकाला गवसणी घालत बजरंगने आपला आलेख आणखी उंचावला होता. त्यामुळे बेलग्रेड येथे सुरू असलेल्या जागतिक स्पर्धेमध्ये त्याच्याकडून सुवर्णपदक जिंकण्याच्या आशा बाळगल्या जात होत्या.

बजरंग याने उपउपांत्यपूर्व फेरीच्या लढतीत क्युबाचा कुस्तीपटू ॲलेक्झँड्रो तोबीएर याच्यावर ५-४ असा विजय साकारत आगेकूच केली होती; मात्र त्यानंतरच्या लढतीत बजरंगला प्रतिमेला साजेशी कामगिरी करता आली नाही. २३ वर्षीय यिआन्नी डायकोमिहालीस याने बजरंगवर तांत्रिक बाबींमध्ये (१०-०) विजय मिळवला.

पंकज, विकीकडून निराशा

पंकज व विकी या भारताच्या दोन कुस्तीपटूंना जागतिक कुस्ती अजिंक्यपद स्पर्धेमध्ये अपयश आले. स्वित्झर्लंडच्या सॅम्यूएल शेररर याने ९७ किलो वजनी गटातील पात्रता फेरीच्या लढतीत विकी याच्यावर विजय मिळवला. तसेच कझाकस्तानच्या असील एताकीन याने ६१ किलो वजनी गटात पंकज याला पराभूत केले.

सागर जगलानला संधी

जागतिक कुस्ती अजिंक्यपद स्पर्धेमध्ये भारताला आतापर्यंत घवघवीत यश संपादन करता आलेले नाही. विनेश फोगाट वगळता एकाही कुस्तीपटूला या प्रतिष्ठेच्या स्पर्धेमध्ये पदक जिंकता आलेले नाही. रवी दहिया यालाही निराशेचा सामना करावा लागला. बजरंग पुनियाही सुवर्णपदकाच्या शर्यतीतून बाहेर फेकला गेला आहे. आता भारताला सागर जगलान याच्याकडून पदक जिंकण्याची अपेक्षा आहे. सागर ७४ किलो वजनी गटात ब्राँझपदकासाठी लढणार आहे. त्याच्यासमोर इराणच्या योन्स एलिकबर इमामिचोघेई याचे आव्हान असणार आहे.