Pakistan Team Unloading Luggage: पाकिस्तान क्रिकेट संघ ३ सामन्यांची कसोटी मालिका खेळण्यासाठी ऑस्ट्रेलियात पोहोचला आहे. नवा कर्णधार शान मसूदच्या नेतृत्वाखालील संघाचे ऑस्ट्रेलियात अशा प्रकारे स्वागत होईल, ज्याची पाकिस्तानी खेळाडूंनी कल्पनाही केली नसेल. सोशल मीडियावर एक व्हिडिओ वेगाने व्हायरल होत आहे ज्यामध्ये पाकिस्तानी खेळाडू सिडनी विमानतळावर स्वतःचे सामान ट्रकमध्ये भरताना दिसत आहेत.

पाकिस्तानी खेळाडू (PAK vs AUS) लाहोरहून दुबईमार्गे सिडनीला पोहोचले आहेत. सामान्यत: विमानतळावर पाकिस्तानी दूतावासातील अधिकारी असायला हवे होते, परंतु पाकिस्तानी दूतावासातील कोणताही अधिकारी किंवा क्रिकेट ऑस्ट्रेलियाचा कोणताही अधिकारी तेथे नव्हता. अशा परिस्थितीत पाकिस्तानी खेळाडू आणि अधिकाऱ्यांना त्यांचे सामान स्वतः उचलून ट्रकमध्ये चढवावे लागले.

मोहम्मद रिझवानने उचलली जबाबदारी

व्हिडिओमध्ये पाकिस्तान क्रिकेट संघाचा वरिष्ठ खेळाडू मोहम्मद रिझवान देखील ट्रकमध्ये उभा राहून इतर सहकाऱ्यांना मदत करताना दिसत आहे. रिझवान ट्रकमध्ये उभा राहून इतर खेळाडूंचे सामान उचलून ट्रकच्या आत ठेवतो. सहसा अशी परिस्थिती विमानतळावर खेळाडूंसोबत पाहायला मिळत नाही. एवढे सगळे करूनही रिजवानने चाहत्यांना नाराज केलं नाही आणि त्यांच्यासोबत सेल्फीसाठी पोज दिली.

पहिली कसोटी १४ डिसेंबरपासून

ऑस्ट्रेलिया आणि पाकिस्तान यांच्यातील मालिकेतील पहिला कसोटी सामना १४ डिसेंबरपासून पर्थमध्ये खेळवला जाणार आहे. या मालिकेत पाकिस्तानी संघ नवा कर्णधार शान मसूदच्या नेतृत्वाखाली मैदानात उतरणार आहे. भारतात नुकत्याच झालेल्या एकदिवसीय विश्वचषकात पाकिस्तानची कामगिरी खराब झाली होती. बाबर आझमच्या नेतृत्वाखालील संघ विश्वचषक स्पर्धेत 9 पैकी 4 सामने जिंकण्यात यशस्वी ठरला. विश्वचषकानंतर पाकिस्तानात परतल्यानंतर बाबरने कर्णधारपद सोडले. (Latest Marathi News)