Pele Health Update : ब्राझीलचे महान फुटबॉलटू पेले यांची प्रकृती पुन्हा एकदा ढासळली असून त्यांना बुधवारी रूग्णालयात दाखल करण्यात आले आहे. याबाबतची माहिती त्यांच्या मुलीने दिली. पेले ख्रिसमसमध्ये रूग्णालयातच राहणार आहेत. पेलेंच्या प्रकृतीबाबत अलबर्ट आईन्स्टाईन रूग्णालयातील डॉक्टरांनी सांगितले की 82 वर्षांचे फुटबॉलपटू पेले यांची किडनी आणि ह्रदय सुरळीत काम करत नाहीये. त्यामुळे त्यांना एलिव्हेटेड केअर मध्ये हलवण्यात आले आहे. डॉक्टरांनी पेलेंच्या श्वसन मार्गातील इन्फेक्शनबाबत कोणतीही माहिती दिलेली नाही. त्यांना कोरोनाची लागण झाल्यानंतर श्वसनाचा आजार बळावला होता.

दरम्यान, पेलेंच्या मुलीने सांगितले की, 'आम्ही डॉक्टरांशी सल्लामसलत करून असे ठरवले आहे की त्यांना काही दिवस रूग्णालयातच ठेवणे योग्य राहील. आमचे नवे कुटुंब आईन्स्टाईन रूग्णालाय त्यांची चांगली काळजी घेत आहे. आम्ही तुमच्यावर खूप प्रेम करतो आणि पेलेंच्या आरोग्याविषयीची माहिती आम्ही पुढच्या आठवड्यात देऊ.'

पेले यांनी ब्राझीलला 1958, 1962 आणि 1970 च्या फिफा वर्ल्डकपमध्ये विजय मिळवून दिला होता. देशाकडून खेळताना त्यांनी 77 गोल मारले होते. त्यांचे हे रेकॉर्ड यंदाच्या वर्ल्डकपमध्ये देखील अबाधित राहिले. कतारमध्ये झालेल्या वर्ल्डकपमध्ये नेमारने त्यांच्या या रेकॉर्डशी बरोबरी साधली.

हेही वाचा : सोंगी भजनाच्या माध्यमातून शांतारामबापूंनी घडवले दत्तदर्शन...