भारतीय संघाच्या टी-20 आणि वनडे वर्ल्ड कप विजेत्या संघाचा सदस्य राहिलेला श्रीसंत दुखापतग्रस्त झालाय. आयपीएलच्या मेगा लिलावात भाव न मिळालेला श्रीसंत (cricketer S. Sreesanth) रणजी ट्रॉफी स्पर्धेत केरळ संघाकडून मैदानात उतरला आहे. 39 वर्षीय जलदगती गोलंदाजावर दुखापतीमुळे रुग्णालयात दाखल करण्याची वेळ आलीये. श्रीसंतने सोशल मीडियाच्या माध्यमातून हॉस्पिटलमधील एक फोटो शेअर केलाय. लवकरात बरा हो, असा संदेश त्याला मित्रांकडून येत आहेत. श्रीसंतचा हॉस्पिटलमधील फोटो सोशल मीडियावर व्हायरल होताना दिसतोय. (Ranji Trophy 2022 s sreesanth hospitalized serious injury sbj86)

रणजी स्पर्धेतील (Ranji Trophy) सामन्यापूर्वी सराव करत असताना त्याला दुखापत झालीये. दुखापतीनंतर त्याला चालणेही शक्य नव्हते. दुखापतीमुळे त्याला आता काही सामन्याला मुकावे लागणार आहे. केरळ संघाची रणजी ट्रॉफीतील पुढची लढत सौराष्ट विरुद्ध रंगली आहे. या स्पर्धेच्या माध्यमातून श्रीसंतने मेघालय विरुद्धच्या सामन्यातून कमबॅक केले होते. केरळकडून त्याने 2 विकेटसह 19 धावांचे योगदानही दिले होते.

उजव्या हाताने जलदगती गोलंदाजी करणारा श्रीसंत 2013 मध्ये स्पॉट फिक्सिंग प्रकरणाच्या आरोपात अडकला होता. तेव्हापासून त्याच्यासाठी आयपीएलचे दरवाजेही बंद झालेत. मिनी आयपीएलसह मेगा आयपीएलमध्ये त्याने नाव नोंदणी केली होती. पण त्याला किंमत देऊन संघात घ्यायची हिम्मत कुणीही दाखवली नाही. आयपीएलच्या मेगा लिलावात त्याने 50 लाख या मूळ किंमतीसह नाव नोंदणी केली होती. आयपीएलमध्ये ठेंगा मिळाल्यानंतरही त्याने आपल्या भावना एका गाण्याच्या माध्यमातून व्यक्त केल्या होत्या.