Ranji Trophy : भारतीय क्रिकेटमध्ये देशांतर्गत स्पर्धांना प्रचंड महत्त्व आहे. या देशांतर्गत क्रिकेट स्पर्धामधून राष्ट्रीय क्रिकेट संघासाठी अनेक चांगले खेळाडू मिळतात. आता याच देशांतर्गत क्रिकेट स्पर्धांच्या बक्षीस रकमेत वाढ करण्यात आली आहे.

भारतीय क्रिकेट नियामक मंडळाचे (BCCI) सचिव जय शहा यांनी आज पुरुषांच्या रणजी तसेच इतर स्पर्धाच्या बक्षीस रकमेत वाढ केली आहे. याचबरोबर महिलांच्या राष्ट्रीय स्तरावरच्या क्रिकेट स्पर्धेच्या बक्षीस रकमेतसुद्धा वाढ करण्यात आली आहे. बीसीसीआयचे सचिव जय शहा यांनी ट्विट करत पुरुषांच्या तसेच महिलांच्या राष्ट्रीय स्तरावरच्या स्पर्धाच्या बक्षीस रकमेत वाढ करत असल्याची घोषणा केली.

"मला पुरुषांच्या तसेच महिलांच्या देशांतर्गत क्रिकेट स्पर्धांच्या बक्षीस रकमेत वाढीची घोषणा करण्यात अतिशय आनंद होत आहे. बीसीसीआयच्या अख्यारीत होणाऱ्या राष्ट्रीय स्तरावरच्या पुरुषांच्या आणि महिलांच्या स्पर्धाच्या बक्षीस रकमेत वाढ करण्यात येत आहे.

देशांतर्गत क्रिकेटमधील सर्वात महत्त्वाची स्पर्धा असणाऱ्या रणजीच्या विजेत्यांना आता पाच कोटी मिळणार आहेत. याआधी रणजीच्या विजेत्यांना तीन कोटी मिळायचे. महिलांच्या एकदिवसीय स्पर्धा जिंकणाऱ्या संघाला आता ५० लाख रुपये बक्षीस मिळणार आहे. याआधी महिलांच्या राष्ट्रीय स्पर्धा जिंकणाऱ्या संघाला सहा लाख रुपये मिळायचे.