पाटना : सर्वाधिक वेळा रणजी विजेता बनलेला मुंबईचा क्रिकेट संघ यंदाच्या मोसमातील पहिल्याच लढतीत विजयाच्या उंबरठ्यावर उभा आहे. पहिल्या डावात २५१ धावा केल्यानंतर बिहारचा पहिला डाव १०० धावांवर गुंडाळून फॉलोऑन लादणाऱ्या मुंबईसमोर बिहारची दुसऱ्या डावात ६ बाद ९१ धावा अशी अवस्था झाली आहे.

मुंबईच्या संघाने एलिट ब गटातील लढतीत डावाने विजय मिळवण्याच्या दिशेने पाऊल टाकले आहे. यजमान बिहारच्या संघाला डावाने पराभवाची नामुष्की टाळण्यासाठी ६० धावांची आवश्‍यकता आहे.

बिहारने नाणेफेक जिंकून प्रथम क्षेत्ररक्षण स्वीकारले. कर्णधार अजिंक्य रहाणे, तुषार देशपांडे यांच्या अनुपस्थिती मुंबईचा संघ मैदानात उतरला. बलाढ्य मुंबईला पहिल्या डावात मोठी धावसंख्या उभारता आली नाही.

त्यांना पहिल्या डावात २५१ धावाच करता आल्या. भूपेन लालवानी, सुवेद पारकर व शिवम दुबे यांनी अर्धशतकी खेळी साकारत मुंबईसाठी मोलाची कामगिरी बजावली. बिहारच्या गोलंदाजांनी मुंबईच्या फलंदाजांना बांधून ठेवताना उल्लेखनीय कामगिरी केली; पण बिहारच्या फलंदाजांना ठसा उमटवता आला नाही.

मोहित अवस्थीच्या प्रभावी गोलंदाजीसमोर बिहारचा पहिला डाव ४४.५ षटकांत १०० धावांवरच आटोपला. शनिवारी, लढतीच्या दुसऱ्या दिवशी बिहारची अवस्था पहिल्या डावात ६ बाद ८९ धावा अशी झाली होती.

भारताच्या उत्तर विभागात हिवाळ्यात धुक्यामुळे समस्या निर्माण होते. त्याच कारणामुळे रविवारी सामन्याला दोन तास उशिरा सुरुवात झाली. मोहित अवस्थीने २७ धावा देत ६ फलंदाज बाद केले.

संक्षिप्त धावफलक ः मुंबई - पहिला डाव सर्व बाद २५१ धावा वि. बिहार - पहिला डाव सर्व बाद १०० धावा (आकाश राज ३२, मोहित अवस्थी ६/२७) आणि दुसरा डाव (फॉलोऑननंतर) ६ बाद ९१ धावा (शिवम दुबे ४/७).

फॉलोऑनची नामुष्की

मुंबईकडून बिहारच्या संघावर फॉलोऑन लादण्यात आला. अष्टपैलू खेळाडू शिवम दुबेच्या प्रभावी गोलंदाजीच्या जोरावर मुंबईने तिसऱ्या दिवसअखेरीस बिहारची अवस्था ६ बाद ९१ धावा अशी केली. शिवम दुबेने १० षटके गोलंदाजी करताना ७ धावांच्या मोबदल्यात चार फलंदाजांना बाद केले. बिहारकडून शर्मन निगरोधने ४० धावांची आणि बिपिन सौरभने नाबाद ३० धावांची खेळी केली. आता या लढतीचा चौथा दिवस उद्या (ता. ८) असेल.