Ravindra Jadaja Wife Rivaba : गुजरातमध्ये सध्या निवडणुकीची धामधूम सुरू आहे. या निवडणुकीत भारतीय संघातील अष्टपैलू खेळाडू रविंद्र जडेजा खूप चर्चेत आला आहे. रविंद्र जडेजाची पत्नी रिवाबा भाजपच्या तिकिटावर निवडणूक लढवणार आहे. शनिवारी एका निवडणूक प्रचार सभेवेळी रिवाबाने रविंद्र जडेजा माझ्यासाठी एक बूस्टर डोस असल्याचे सांगितले. यावेळी तिने रविंद्र जडेजाबरोबरचा एक किस्सा देखील सांगितला.

जामनगर विधानसभा मतदार संघातून निवडणूक लढवणाऱ्या रिवाबाने प्रचारसभेदरम्यान रविंद्र जडेजाचे आपल्याला खूप समर्थन मिळते असे सांगितले. यावेळी तिने एक शूजचा किस्सा सांगितला. ती म्हणाला की, 'यापूर्वी मी लेस असलेले शूज घालून प्रचार करत होते. मी माझ्या पतीला सांगितले की मला आरामदायक शूज पाहिजे. त्यावेळी त्यांनी मला नवीन शूज थेट प्रचार सभेत आणून दिले. हे अनेक उदाहरणामधील एक उदाहरण आहे.'

रिवाबा पुढे म्हणाले की, 'लग्नव्यवस्थेचा एक आपलाच अर्थ असतो. पती पत्नीने एकमेकांसाठी उभे राहिले पाहिजे आणि एकमेकांना साथ दिली पाहिजे. ज्यावेळी मी निवडणूक अर्ज भरण्यासाठी गेले त्यावेळी माझे पती माझ्यासोबत होते हा क्षण माझ्यासाठी खूप भावूक करणारा होता. मी अनेक जोडप्यांना सांगू इच्छिते की लग्नानंतरही महिला आपली स्वप्ने पूर्ण करू शकतात आणि यामध्ये पती तुम्हाला समर्थन देऊ शकतात.'

रिवाबाबद्दल रविंद्र जडेजा म्हणाला होता की, 'रिवाबाही निवडणुकीच्या रिंगणात पहिल्यांदाच उतरली आहे. तिला अजून बरंच काही शिकायचं आहे. मला आशा आहे ती प्रगती करेल.' जडेजाने जामनगरच्या लोकांना रिवाबाला निवडून देण्याचे आवाहन देखील केले.