Rohit Sharma Statement About Slog Over : भारताने तिसऱ्या टी 20 सामन्यात ऑस्ट्रेलियाचा 6 गडी राखून पराभव करत तीन सामन्यांच्या मालिका 2 - 1 अशी जिंकली. भारताने ऑस्ट्रेलियाचे 187 धावांचे टार्गेट 19.5 षटकात पार केले. ऑस्ट्रेलियाने पॉवर प्लेमध्ये चांगली फलंदाजी केली होती. त्यानंतर भारतीय फिरकीपटूंनी ऑस्ट्रेलियाच्या धावगतीला चांगला ब्रेक लावला होता. मात्र स्लॉग ओव्हरमध्ये पुन्हा भारताने 52 धावा दिल्या. सामना झाल्यानंतर कर्णधार रोहित शर्माने स्लॉग ओव्हरमधील भारताच्या गोलंदाजीबद्दल वक्तव्य केले.

रोहित शर्मा म्हणाला की, 'भारतासाठी स्लॉग ओव्हरसह काही विभाग डोकेदुखी ठरू शकतात. हर्षल (Harshal Patel) आणि बुमराह (Jasprit Bumrah) दीर्घ काळानंतर आंतरराष्ट्रीय सामने खेळत आहेत. ऑस्ट्रेलियाच्या मधल्या फळीतील फलंदाजांना स्लॉग ओव्हरमध्ये गोलंदाजी करणे कठिण काम असते. मी स्लॉग ओव्हरची जास्त चिंता करत नाहीये. ते एका ब्रेकनंतर खेळत आहेत. त्यामुळे त्यांना लय मिळायला वेळ लागणार. मला आशा आहे की ते त्यांची लय पकडतील.'

हर्षल पटेल आणि जसप्रीत बुमराह दुखापतीतून सावरत दीर्घ काळानंतर आंतरराष्ट्रीय सामना खेळत आहेत. मात्र भुवनेश्वर कुमारचा (Bhuvneshwar Kumar) प्रश्न आहेच. दरम्यान रोहित शर्मा ऑस्ट्रेलियाविरूद्धच्या मालिकेतील कामगिरीवर खूष आहे. तो म्हणला की, 'आम्ही ऑस्ट्रेलियाविरूद्ध चांगली कामगिरी करण्याचा प्रयत्न केला. सर्वात सकारात्मक गोष्ट म्हणजे विविध खेळाडूंनी मग ते गोलंदाज असो किंवा फलंदाज त्यांनी आपली कामगिरी उंचावली. ज्यावेळी तुम्ही या कामगिरीचं अवलोकन करता त्यावेळी तुम्हाला अशी कामगिरी पाहून आनंद होतो. संघ व्यवस्थापन म्हणून तुम्हाला चांगले वाटते.'