पोर्ट ऑफ स्पेन : भारताने वेस्ट इंडीज विरूद्धचा (West Indies Vs India) पहिला वनडे सामना अवघ्या 3 धावांनी जिंकला. या विजयाबरोबरच भारताने तीन सामन्यांच्या मालिकेत 1 - 0 अशी आघाडी घेतली. भारताकडून कर्णधार शिखर धवनने (Shikhar Dhawan) दमदार फलंदाजी करत 97 धावांची खेळी केली. त्याचे शतक अवघ्या (Century) तीन धावांनी हुकले. मात्र या विजयानंतर देखील शिखर धवन निराश आहे.

भारताने वेस्ट इंडीजसमोर विजयासाठी 309 धावांचे आव्हान ठवले होते. या आव्हानाचा पाठलाग करताना विंडीजकडून कायल मायेर्स आणि ब्रँडन किंग यांनी अर्धशतकी खेळी केली. मात्र मोक्याच्या क्षणी भारतीय गोलंदाजांनी सामन्यावर पुन्हा वर्चस्व मिळवले. अखेर भारताने पहिला सामना 3 धावांनी जिंकला. या सामन्याचा सामनावीर म्हणून 97 धावांची खेळी करणाऱ्या शिखर धवनची निवड करण्यात आली.

दरम्यान, सामन्यानंतर झालेल्या कार्यक्रमात शिखर धवन म्हणाला की, 'शतक साजरे करता आले नाही यामुळे मी निराश आहे. मात्र एकूण हा एक सांघिक प्रयत्न होता. आम्ही एक चांगली धावसंख्या उभारली होती. सामना शेवटच्या चेंडूपर्यंत रोमहर्षक झाला. सामना शेवटच्या चेंडूपर्यंत जाईल असे वाटले नव्हते. आम्ही दबावाच्या स्थितीत शांत राहिलो. आम्ही फाईन लेग मागे ठेवत एक छोटा बदल केला. त्याचा चांगला फायदा झाला. मैदानाच्या मोठ्या बाजूचा जास्तीजास्त वापर करून घेण्याचा आम्ही प्रयत्न केला. आम्ही आमची शिकण्याची प्रक्रिया कायम ठेवणार असून येणाऱ्या सामन्यात अजून चांगली कामगिरी करण्याचा प्रयत्न करू.'

भारताने पहिल्या सामन्यात 50 षटकात 7 बाद 308 धावा केल्या होत्या. त्यात शिखर धवन (97), शुभमन गिल (64) आणि श्रेयस अय्यर (54) यांचे मोठे योगदात होते. विंडीजकडून गुडाकेश मोटियेने 54 धावात 2 विकेट घेतल्या. भारताचे 309 धावांचे आव्हान पार करण्यासाठी मैदानात उतरलेल्या कायल मायेर्सने (75) तर ब्रँडन किंग (54) यांना अर्धशतकी खेळी करत विंडीजला चांगली सुरूवात करून दिली. त्यानंतर अकील हुसेनने नाबाद 32 आणि रोमारियो शेफर्ड ने 39 धावांची खेळी करत सामन्यात रंगत आणली. मात्र भारताने सामना 3 धावांनी जिंकला. भारताकडून मोहम्मद सिराज, शार्दुल ठाकूर आणि युझवेंद्र चहल यांनी प्रत्येकी 2 विकेट घेतल्या.