Shreyas Iyer Bails VIDEO : भारत आणि बांगलादेश यांच्यातील पहिल्या कसोटीच्या पहिल्या दिवशी श्रेयस अय्यरने नाबाद 82 धावा केल्या. मात्र त्याच्या या खेळीत त्याला दोनदा जीवनदान मिळाले. 75 व्या षटकात इबादतने मेहदी हसनच्या गोलंदाजीवर त्याचा सोपा झेल सोडला होता. तर इबादतच्या गोलंदाजीवर श्रेयस अय्यरचा त्रिफळा उडाला होता. मात्र पंचांनी त्याला बाद ठरवले नाही. या घटनेवेळी इबादतसह संपूर्ण बांगलादेशचा संघ श्रेयस अय्यरला लाभलेल्या नशीबावर अवाक झाला होता. दुसरीकडे श्रेयस अय्यर आणि चेतेश्वर पुजारा हसत होते.

इबादतने टाकलेला 83 व्या षटकातील पाचवा चेंडू पडून जोरात आत आला. श्रेयसला काही समजायच्या आतच चेंडू स्टम्पला चाटून गेला. बेल्सची लाईट देखील लागली. मात्र बेल्स काही खाली पडली नाही. इबादतसह बांगलादेशच्या संघाला वाटले की आता श्रेयस अय्यर बाद झाला. मात्र बेल्स जागेवरून हलली नाही त्यामुळे पंचांनी श्रेयसला बाद ठरवले नाही. विशेष म्हणजे याच षटकात पंचांनी हीच बेल्स बदलली होती.

अय्यरचे आज नशीबच चांगले होते. त्यानंतर अय्यर शेवटच्या षटकापार्यंत टिकून राहिला आणि दिवसअखेर धावा केल्या. आता या दोन जीवनदांनांचा फायदा उचलत श्रेयस अय्यर आपले शतक साजरे करतो का हे पहावे लागले.

दरम्यान, भारताने बांगलादेशविरूद्धच्या पहिल्या कसोटी सामन्यात पहिल्या दिवशी 6 बाद 278 धावांपर्यंत मजल मारली. भारताकडून चेतेश्वर पुजाराने 203 चेंडूत 90 धावा ठोकल्या. तर श्रेयस अय्यर दिवसअखेर 82 धावा करून नाबाद राहिला. ऋषभ पंतनेही 45 चेंडूत 46 धावा ठोकत आपले योगदान दिले. बांगलादेशकडून डावखुरा फुरकी गोलंदाज तैजुल इस्लामने 3 तर मेहदी हसन मिर्झाने 2 विकेट घेत भारताच्या टॉप ऑर्डरला खिंडार पाडले. दिवसाच्या अखेरच्या चेंडूवर अक्षर पटेल 14 धावांवर बाद झाला.

हेही वाचा : संयुक्त नावावरील गृहकर्जातून होईल प्राप्तीकराची बचत..