Shreyas Iyer : भारताचा मधल्या फळीतील फलंदाज श्रेयस अय्यरची अफगाणिस्तानविरूद्धच्या टी 20 मालिकेसाठी भारतीय संघात निवड झालेली नाही. सुरूवातीला बीसीसीआयने त्याला विश्रांती दिल्याचे सांगण्यात आलं होतं. मात्र इंग्रजी माध्यामांनी दिलेल्या वृत्तानुसार अय्यरवर शिस्तभंगाची कारवाई झाली त्यामुळे त्याचा अफगाणिस्तान मालिकेतून पत्ता कट झाला.

दरम्यान, अफगाणिस्तानविरूद्धच्या पहिल्या वनडे सामन्यापूर्वी झालेल्या पत्रकार परिषदेत प्रशिक्षक राहुल द्रविडने सांगितले की अय्यरवर शिस्तभंगाची कारवाई झाली नसून संघात खूप फलंदाज होत होते म्हणून त्याला संघात घेण्यात आलं नाही.

दुसरीकडे माध्यमांनी दिलेल्या वृत्तानुसार दक्षिण आफ्रिकेतील कसोटी मालिकेत खराब कामगिरीनंतर निवडसमितीने श्रेयस अय्यरला रणजी ट्रॉफी सामने खेळण्यास सांगितले होते. मात्र त्याने सुट्टी घेणे पसंत केले. निवडसमितीला हे आवडले नाही. त्यांनी अय्यरवर शिस्तभंगाची कारवाई करत त्याला अफगाणिस्तानविरूद्धच्या टी 20 मालिकेसाठी निवडलेल्या संघातून डच्चू दिला.

यानंतर श्रेयस अय्यरने रणजी ट्रॉफी सामना खेळण्याचा निर्णय घेतला आहे. त्याचा समावेश मुंबईच्या रणजी संघात करण्यात आला असून मुंबईचा संघ 12 ते 15 जानेवारीदरम्यान आंध्र प्रदेशविरूद्ध रणजी सामना खेळणार आहे. त्या संघात अय्यरचा समावेश करण्यात आला आहे. इंग्लंडविरूद्धच्या पाच कसोटी सामन्यांच्या मालिकेपूर्वी अय्यरसाठी ही सरावाची उत्तम संधी आहे.