FIFA World Cup : दक्षिण कोरियाचा स्टार फुटबॉल खेळाडू आणि टोटेनहॅमकडून आक्रमक फळीत खेळणाऱ्या सुन ह्युंग मीनने आपला संघ यंदाच्या विश्वकरंडक स्पर्धेची बाद फेरी गाठेल, असा आत्मविश्वास व्यक्त केला आहे. सुन ह्युंग मीनवर महिन्याच्या सुरुवातीला शत्रक्रिया झाली होती. चेहऱ्यावर झालेल्या या शत्रक्रियेनंतर आता तो संघाबरोबर आहे. कतारची राजधानी असणाऱ्या दोहामध्ये तो उतरला असता पत्रकारांशी संवाद साधताना त्याने दक्षिण कोरियाचा संघ बादफेरी गाठेल, असा विश्वास व्यक्त केला आहे.

हेही वाचा : Gautami Patil- लावणीचा बाजच अश्लीलतेचा?

याबाबत अधिक बोलताना तो म्हणाला की, ‘चेहऱ्यावर झालेल्या शस्त्रक्रियेनंतर संघाबरोबर विश्वकरंडक खेळू शकेन की नाही, याबाबत माझ्या मनात सुरुवातीला शंका होती; तरी अजूनही माझे सहकारी आणि मी दुखापतीवर लक्ष ठेवून आहोत. विश्वकरंडकात खेळणार, यावर मी ठाम आहे. संघाला कसा विजय मिळवता येईल आणि आमच्या पाठीराख्यांना कसे खुश ठेवता येईल, यासाठी मी मोठ्या प्रमाणात प्रयत्न करणार आहे. आमचा ज्या ह गटात समावेश आहे, तो गट अतिशय कठीण असून आम्ही नक्कीच स्पर्धेची बाद फेरी गाठू, याबद्दल सहकाऱ्यांमध्ये आणि माझ्यामध्ये आत्मविश्वास आहे.’

सुन ह्युंग मीनला मार्सेलविरुद्धच्या चॅम्पियन्स लीग सामन्यात खेळताना चेहऱ्याला दुखापत झाली होती. दुखापतीवर शस्त्रक्रिया झाल्यानंतर तो आता दोहामध्ये संघाशी जोडला गेला असून त्याच्या चेहऱ्यावर एक विशिष्ट पद्धतीचा मास्क आहे. हा त्याचा सलग तिसरा विश्वकरंडक असून त्याने देशाकडून १०४ आंतरराष्ट्रीय सामने खेळताना ३५ गोल केले आहेत.