मुंबई : हार्दिक पांड्याने (Hardik Pandya) पहिल्यांदाच नेतृत्व करताना गुजरात टायटन्सला पहिल्याच आयपीएल (IPL 2022) हंगामात विजेतपदापर्यंत पोहचवले. हार्दिकने यंदाच्या हंगामात फक्त नेतृत्वच केले नाही तर त्याने फलंदाजी आणि गोलंदाजीतही आपला दम दाखवून दिला. हंगामापूर्वी त्याच्या गोलंदाजीबाबत शंका उपस्थित केली जात होती. मात्र त्याने 140 किमी प्रतीतास वेगाने गोलंदाजी करत आपण बॉलिंग करण्यासाठी फिट झालो असल्याचे दाखवून दिले.

हार्दिकने या कामगिरीच्या जोरावर टीम इंडियातील आपली गमावलेली जागा देखील पुन्हा मिळवली आहे. मात्र आयपीएलमध्ये तिसऱ्या आणि चौथ्या क्रमांकावर फलंदाजी करणारा हार्दिक पांड्या टीम इंडियात कोणत्या क्रमांकावर फलंदाजी करणार हा प्रश्नच आहे. याबाबत भारताचे माजी कर्णधार आणि समालोचक सुनिल गावसकर (Sunil Gavaskar) यांनी आपले मत व्यक्त केले.

सुनिल गावसकर म्हणाले की, 'मला असे वाटते हार्दिक पांड्या भारतीय संघात पाचव्या किंवा सहाव्या क्रमांकावर फलंदाजी करेल. तुम्ही विचार करा जर भारताकडे हार्दिक पांड्या आणि ऋषभ पंत (Rishabh Pant) पाचव्या किंवा सहाव्या क्रमांकावर फलंदाजीला येत आहेत. ते दोघे या क्रमांकावर येऊन फटकेबाजी करायला लागले तर भारत 14 ते 20 या 6 षटकात जवळपास 100 ते 120 धावा करेल अशी अपेक्षा आहे. त्यांच्याकडे ती क्षमता आहे. मी हे पाहण्यासाठी उत्सुक आहे. ऋषभ पंत - हार्दिक पांड्या पाचव्या आणि सहाव्या क्रमांकावर फलंदाजीला येतील'

हार्दिक पांड्याने यंदाच्या आयपीएल हंगामात 15 सामन्यात 487 धावा केल्या आहेत. त्याची सरासरी 44.27 इतकी राहिली आहे. त्याने 131.27 च्या सरासरीने धावा केल्या आहेत. फलंदाजीतील ही त्यांची आयपीएलमधील सर्वोत्तम कामगिरी आहे. यापूर्वी त्याने एका हंगामात 16 सामन्यात 402 धावा केल्या आहेत. 2019 ला मुंबई इंडियन्सकडून खेळताना त्याने ही कामगिरी केली होती.