Suryakumar Yadav : भारत आणि न्यूझीलंड यांच्यातील तिसरा वनडे सामना ख्राईस्टचर्च येथे होणार आहे. न्यूझीलंडने पहिला वनडे सामना जिंकून मालिकेत 1 - 0 अशी आघाडी घेतली आहे. दुसरा वनडे सामना पावसामुळे रद्द झाला. आता तिसऱ्या सामन्यात मालिकेचा निकाल लागण्याची शक्यता आहे. भारताला मालिका वाचवण्यासाठी तिसरा वनडे सामना जिंकणे खूप गरजेचे आहे. भारताच्या फलंदाजीची मदार ही सूर्यकुमार यादववर असणार आहे. तसेच या सामन्यात सूर्यकुमार यादवला एक मोठा विक्रम करण्याची संधी आहे.

तिसऱ्या वनडे सामन्यात सूर्यकुमार यादव आपल्या 360 डिग्री खेळीचा जलवा दाखवू शकला तर तो रोहित शर्माचे एक खास रेकॉर्ड मोडू शकतो. जर सूर्यकुमार यादवने तिसऱ्या सामन्यात पाच षटकार मारले तर एका कॅलेंडर वर्षात सर्वाधिक षटकार मारणाऱ्यांच्या यादीत सूर्यकुमार अव्वल स्थानावर पोहचू शकतो.

रोहित शर्माने 2019 मध्ये एकूण 78 षटकार मारले. आता सूर्यकुमार यादवच्या रडावर रोहितचा हा विक्रम आहे. तिसऱ्या वनडे सामन्यात जर सूर्यकुमार यादवने पाच षटकार मारले तर तो एका कॅलेंडर वर्षात सर्वाधिक षटकार मारण्याचा विक्रम आपल्या नावावर करू शकतो. मात्र तिसऱ्या सामन्यावर देखील पावसाचे सावट आहे. जर सामन्यात पावसाचा व्यत्यय आला नाही तर सूर्यकुमारला हा विक्रम मोडण्याची संधी आहे.

हेही वाचा : दुधाच्या प्लास्टिक पिशवीचा कापलेला छोटा कोपराही घडवेल अनर्थ..