पर्थ : पहिल्या सराव सामन्यात विजय संपादन करीत टी-२० विश्‍वकरंडकाआधी कसून सराव करणारा भारतीय क्रिकेट संघ येथे झालेल्या दुसऱ्या सराव सामन्यात पराभूत झाला. पश्‍चिम ऑस्ट्रेलिया इलेव्हन संघाने भारतीय संघावर ३६ धावांनी विजय साकारला. के. एल. राहुलच्या ७४ धावांच्या खेळीला विजयाचा टिळा लागला नसला, तरी त्याने फलंदाजीचा सराव करवून घेतला; मात्र भारताचे इतर फलंदाज सपशेल अपयशी ठरले.

१६९ धावांच्या आव्हानाचा पाठलाग करताना भारतीयांची सुरुवात संथ झाली. राहुलसोबत रिषभ पंत याला सलामीला पाठवण्यात आले. जेसन बेहरनडोर्फ व मॅथ्यू केली यांनी अचूक टप्प्यात प्रभावी गोलंदाजी केली. बेहरनडोर्फच्या गोलंदाजीवर पंत आक्रमक फटकेबाजी करायला गेला आणि ९ धावांवर निक हॉब्सनकरवी झेलबाद झाला. दीपक हुडाला तिसऱ्या क्रमांकावर बढती देण्यात आली, पण लान्स मॉरीसने त्याला ६ धावांवरच बाद केले. अँड्रयू टे राहुलला ७४ धावांवर बाद केले आणि भारताचे विजयाचे दार बंद केले. राहुलने आपल्या खेळीत ९ चौकार व २ षटकार मारले. भारताला ८ बाद १३२ धावा करता आल्या. याआधी रवी अश्‍विने ३ बळी टिपले. तसेच रोहित शर्मा व विराट कोहली हे फक्त क्षेत्ररक्षणासाठी मैदानात उतरले.

संक्षिप्त धावफलक

पश्‍चिम ऑस्ट्रेलिया - २० षटकांत ८ बाद १६८ धावा (डाअर्सी शॉर्ट ५२, निक हॉब्सन ६४, रवीचंद्रन अश्‍विन ३/३२) विजयी वि. भारत २० षटकांत ८ बाद १३२ धावा (के. एल. राहुल ७४, लान्स मॉरीस २/२३).