मोहाली : महाराष्ट्राच्या संघाला सय्यद मुश्‍ताक अली टी-२० करंडकाच्या क गटातील सलामीच्या लढतीत कर्नाटक संघाकडून दारुण पराभवाला सामोरे जावे लागले. देवदत्त पडीक्कलच्या नाबाद १२४ धावा आणि विधवात काविरप्पा याची प्रभावी गोलंदाजी कर्नाटकच्या विजयाचे वैशिष्ट्य ठरले.

कर्नाटककडून मिळालेल्या २१६ धावांच्या आव्हानाचा पाठलाग करताना महाराष्ट्राला २० षटकांत ८ बाद ११६ धावाच करता आल्या. दिव्यांग हिंगणेकर याने ४७ धावांची खेळी साकारली. शम्सहुझामा काझी याने नाबाद २८ धावांची खेळी केली. पण कोणालाही मोठी खेळी करता आली नाही. विधवात काविरप्पा याने १९ धावा देत ३ फलंदाजांना पॅव्हेलियनचा रस्ता दाखवला. विजयकुमार विशाक याने २० धावा देत २ फलंदाजांना पॅव्हेलियनमध्ये पाठवले.

त्याआधी महाराष्ट्राने नाणेफेक जिंकून प्रथम क्षेत्ररक्षण करण्याचा निर्णय घेतला. देवदत्त पडीक्कल याने ६२ चेंडूंमध्ये नाबाद १२४ धावांची स्फोटकी खेळी साकारली. यामध्ये १४ चौकार व ६ षटकारांचा समावेश होता. मनीष पांडे या अनुभवी फलंदाजाने ५० धावांची खेळी करीत त्याला उत्तम साथ दिली. कर्नाटकने २० षटकांत २ बाद २१५ धावा फटकावल्या.