गेल्या काही दिवसांपासून अनेक दिग्गज खेळाडू राजकारणात एन्ट्री करताना दिसत आहेत. त्यातच आता बीसीसीआय अध्यक्ष सौरव गांगुलीपाठोपाठ (Sourav Ganguly) टीम इंडियाचा हेड कोच राहुल द्रविड (Rahul Dravid) राजकारणात प्रवेश करणार असल्याची चर्चा सुरू झालीय. भारतीय जनता पक्षाच्या युवा मोर्चाचे संमेलन हिमाचल प्रदेशच्या (Himachal Pradesh) धर्मशालामध्ये 13 ते 15 मे या कालाधीमध्ये होणार आहे. या शिबिराला राहुल द्रविड उपस्थित राहणार आहे.

दरम्यान, पुढील वर्षी होणाऱ्या कर्नाटक विधानसभा निवडणुकीची (Karnataka Assembly Election 2023) तयारी भाजपानं सुरू केलीय. द्रविडची भाजपाच्या शिबिराला उपस्थिती ही याच तयारीचा भाग मानली जात आहे, त्यामुळं राजकीय चर्चांना उधाण आलंय. राहुल द्रविडसह कुस्तीपटू बबिता फोगट देखील या शिबिराला उपस्थित राहणार असल्याचं कळतंय.

भाजपाचे राष्ट्रीय अध्यक्ष जेपी नड्डा (JP Nadda), हिमाचल प्रदेशचे मुख्यमंत्री जयराम ठाकूर यांच्यासह पक्षाचे अनेक प्रमुख नेते या शिबिराला उपस्थित राहणार आहेत. संपूर्ण देशभरातून 139 प्रतिनिधी या शिबिरामध्ये उपस्थित राहणार असल्याची माहिती आहे.