World Cup 2023 Team India : भारतात खेळल्या जाणाऱ्या वर्ल्ड कप 2023 साठी बीसीसीआयने आपल्या संघाची घोषणा केली आहे. वर्ल्ड क्रिकेटमध्ये हिटमॅन म्हणून ओळखल्या जाणाऱ्या मुंबईच्या रोहित शर्माकडे संघाची धुरा सोपवण्यात आली आहे. संघात समतोल साधण्यावर निवड समितीचे अध्यक्ष अजित आगरकर यांनी भर दिला आहे.

कागदावर भारतीय संघ समतोल दिसत आहे. तरीही प्रतिस्पर्धी संघातील डावखुऱ्या फलंदाजांचा भरणा बघून एक तरी ऑफ स्पिनर संघात ठेवायला हवा होता असे काहींचे म्हणणे आहे. पण संघात एक नव्हे ते सात कर्णधार हा किस्सा दक्षिण आफ्रिकेत खेळल्या गेलेल्या 2003 वर्ल्ड कप मधला आहे.

2003 वर्ल्ड कपमध्ये त्या वेळेचा भारतीय कर्णधार सौरभ गांगुली आणि प्रशिक्षक जॉन राईट यांनी संघ बांधणी करताना एक कल्पना काढली. संघातील सर्व खेळाडूंचा योजना आखण्यात सकारात्मक सहभाग असावा या विचाराने फलंदाजी, गोलंदाजी आणि क्षेत्ररक्षण या आघाड्यांवर गुणात्मक सुधारणा करायला प्रत्येक आघाडीवर दोन खेळाडूंची निवड केली.

फलंदाजीसाठी सचिन तेंडुलकर आणि राहुल द्रविड, गोलंदाजीसाठी जवागल श्रीनाथ आणि अनिल कुंबळे, तर क्षेत्ररक्षणासाठी कैफ-युवराज अशा जोड्यांची निवड केली. संघात या खेळाडूंना त्या-त्या क्षेत्रात कर्णधार मानले गेले.

वर्ल्ड कपवर याचा परिणाम असा झाला की, संघात सौरभ गांगुलीसह एकूण सात कर्णधार झाले. प्रत्येक आघाडीवरचे कर्णधार आपापल्या क्षेत्रात संघाने प्रगती करावी म्हणून काम करू लागले.

जबाबदारीसोबत अधिकार दिल्याने प्रत्येकाचा सहभाग वाढला. संघात लक्षणीय बदल जाणवू लागला. झिम्बाब्वे विरुद्धचा सामना भारतीय संघाने दिमाखात जिंकला आणि भारतीय संघाच्या कामगिरीला लय सापडली. मग समोर आलेल्या प्रत्येक संघाला पराभूत करायचा भारतीय संघाने जणू धडाका लावला. एका संघात सात कर्णधार नेमण्याची विलक्षण योजना भलतीच यशस्वी ठरली.