नवी दिल्ली- भारतीय क्रिकेट संघाने टी-२० वर्ल्ड कपच्या अंतिम सामन्यात दक्षिण आफ्रिकेचा सात धावांनी पराभव केला आहे. भारतीय संघाच्या या काम़गिरीवर संपूर्ण भारतवासी खूष आहेत. याच दरम्यान, भारतीय संघाऐवजी दक्षिण आफ्रिकेच्या संघाला सपोर्ट करणाऱ्या MBA चायवाल्याचं क्रिकेटप्रेमी कौतुक करत आहेत. अनेकांना प्रश्न पडू शकतो की, विरोधी संघाला सपोर्ट करून देखील त्याचं कौतुक का होतंय? याचं उत्तर एकदम खास आहे.

MBA चायवाला म्हणजे प्रफुल्ल बिल्लोरे ज्या कोणत्या संघाला सपोर्ट करतो तो संघ हरतो असा आजपर्यंतचा अनुभव आहे. यामुळेच लोकांनी त्याला पनौती म्हणण्यास सुरुवात केली. याचमुळे प्रफुल्लने यावेळी अंतिम सामन्यासाठी दक्षिण आफ्रिकेला सपोर्ट करण्याचं ठरवलं होतं. त्यामागे भारताचा विजय व्हावा असा प्रामाणिक हेतू होता. योगायोगाने दक्षिण आफ्रिकेचा संघ हरलाय. त्यामुळेच त्याचे कौतुक होत आहे.

प्रफुल्लने एखाद्या संघाला सपोर्ट केले किंवा एखाद्या खेळाडूसोबत फोटो टाकला तर त्याच्यासोबत काहीतरी वाईट घडतं असा नेटकऱ्यांचा समज झालेला आहे. सूर्यकुमार यादवसोबत प्रफुल्लने फोटो टाकले होते. तेव्हापासून सूर्या फ्लॉप जात आहे. त्यामुळे सोशल मीडियावर प्रफुल्ल याला ट्रोल केले जात होते. पनौती म्हणून त्याला हिणवलं जातं होतं.

प्रफुल्ल बिल्लोरेने म्हणूनच दक्षिण आफ्रिकेला सपोर्ट करण्याचा निर्णय घेतला. जेणेकरून दक्षिण आफ्रिकेसाठी तो पनौती ठरेल आणि भारतीय संघाचा विजय होईल. आणि योगायोग तसंच झालं आहे. त्यानंतर प्रफुल्लने एक व्हिडिओ शेअर केला आहे. यामध्ये त्याने पनौती लिहिलेला टी-शर्ट घातलेलं दिसत आहे. यावेळी तो भावुक झाल्याचं दिसत आहे.

प्रफुल्ल बिल्लोरे उर्फ MBA चायवाला याच्याबद्दल लोकांमध्ये त्यामुळे प्रेम निर्माण झालं आहे. अनेकांनी त्याचे दक्षिण आफ्रिकेला सपोर्ट केल्याबद्दल धन्यवाद मानले आहेत. तुझे योगदान देश लक्षात ठेवेल अशा प्रकारची प्रतिक्रिया एका नेटकऱ्याने दिली आहे. त्यामुळे पनौती ठरलेला प्रफुल्ल सध्या कौतुकास पात्र ठरत आहे.