जीनिव्हा : पॅरिस ऑलिंपिक स्पर्धेत रशिया आणि बेलारुसचे खेळाडू पॅरिसमध्ये असतील, परंतु त्यांना ऑलिंपिकमधील उद्‌घाटनाच्या पारंपरिक परेडमध्ये प्रवेश नसेल, असे आंतरराष्ट्रीय ऑलिंपिक समितीने जाहीर केले आहे.

येत्या २६ जुलै रोजी होणारा पॅरिस ऑलिंपिक स्पर्धेचा उद्‌घाटन सोहळा आगळावेगळा आणि परंपरेला छेद देणारा असणार आहे. सर्व खेळाडू अनेक किलोमीटर दूरवरून सीन नदीतून प्रवास करत आयफेल टॉवरकडे येणार आहेत. या ऑलिंपिक स्पर्धेत सहभागी होण्याची मान्यता मिळालेले रशिया आणि बेलारूसमधील खेळाडू या सोहळ्यात भाग घेणार नाहीत, तर ते नदीच्या तीरावर राहून हा सोहळा पाहू शकतील. ही ऑलिंपिक स्पर्धा संपल्यानंतर २६ ऑगस्टपासून याच पॅरिसमध्ये पॅरालिंपिक स्पर्धा होणार आहे. रशिया आणि बेलारूसच्या खेळाडूंसाठी आयओएचा हाच निर्णय कायम असणार आहे.

युक्रेनवर युद्ध लादणाऱ्या आणि त्यांच्यावर हल्ला करणाऱ्या रशिया आणि बेलारूसच्या खेळाडूंना ऑलिंपिक स्पर्धेतील सांघिक स्पर्धा शर्यतीतून बंदी घालण्यात आली आहे; मात्र त्यांचे खेळाडू तटस्थ म्हणून वैयक्तिक प्रकारात सहभागी होण्यास परवानगी देण्यात आली आहे, परंतु या खेळाडूंना प्रथम त्यांच्या त्यांच्या क्रीडा संघटनेकडून मान्यता मिळणे आवश्यक आहे आणि त्यानंतर या खेळाडूंना आयओसी नियुक्त रिव्ह्यू पॅनेल मान्यता देईल.

रशिया आणि बेलारूसमधील जे खेळाडू वैयक्तिक स्पर्धेत खेळण्यास पात्र ठरतील ते खेळाडू सैन्यदलातील किंवा सुरक्षा एजन्सीमधील कर्मचारी नसावेत अशीही प्रमुख अट तयार करण्यात आली आहे; मात्र रशिया मिलिट्री स्पोर्ट क्लबमधील खेळाडू सहभागासाठी पात्र आहेत की नाहीत, हे अद्याप स्पष्ट झालेले नाही.

या पॅरिस ऑलिंपिक स्पर्धेत रशियाचा पासपोर्ट असलेले ३६ आणि बेलारूसचा पासपोर्ट असलेले २२ खेळाडू तटस्थ खेळाडू म्हणून खेळण्याची शक्यता आयओसीने व्यक्त केली. या सर्वांना उद्धघाटन सोहळ्यात तर प्रवेश नसेलच, परंतु ११ ऑगस्ट रोजी होणाऱ्या समारोप सोहळ्यातील त्यांच्या प्रवेशाबाबत नंतर निर्णय घेण्यात येईल, असे आयओएने म्हटले आहे.