पुणे : महिला टी 20 चॅलेंज स्पर्धेत आज सुपरनोव्हा आणि व्हिलॉसिटी यांच्यात सामना रंगत आहे. व्हिलॉसिटीने नाणेफेक सुपरनोव्हाला प्रथम फलंदाजी करण्यासाठी पाचारण केले. मात्र सुपरनोव्हाची सुरूवात खराब झाली. केट क्रॉस आणि दिप्ती शर्मा यांनी मिळून सुपरनोव्हाची अवस्था 3 बाद 18 धावा अशी केली. मात्र त्यानंतर कर्णधार हरमनप्रीत कौर आणि तानिया भाटिया यांनी डाव सावरला.

अखरे ही जोडी फोडण्यासाठी कर्णधार दिप्ती शर्माने 11 व्या षटकात लेग स्पिनर माया सोनवणेला पाचारण केले. तिने आपल्या पहिल्या षटकाचा पहिला चेंडू टाकल्यानंतरच तिची बॉलिंग अ‍ॅक्शन पाहून अनेकजण अवाक झाले. तिची बॉलिंग अ‍ॅक्शन ही साधारणपणे पॉल अ‍ॅडम्ससारखी आहे. माया सोनवणेने आजच्या सामन्यात दोन षटके टाकली. तिने पहिल्या षटकात पाच तर दुसऱ्या षटकात 14 धावा दिल्या.

दरम्यान, प्रथम फलंदाजी करणाऱ्या सुपरनोव्हाने 20 षटकात 5 बाद 150 धावा केल्या. खराब सुरूवातीनंतर हरमनप्रीत कौर आणि तानिया भाटियाने चौथ्या विकेटसाठी 82 धावांची दमदार भागीदारी रचली. हरमनप्रीत कौरने 51 चेंडूत 71 धावा केल्या. तर तानिया भाटियाने 32 चेंडूत 36 धावा केल्या.