T20 World Cup 2021 ला रविवारपासून सुरूवात झाली. ओमान विरूद्ध पापुआ न्यू गिनी या सामन्याने स्पर्धेची सुरूवात झाली. या सामन्यात पापुआ न्यू गिनीचा ओमानने दहा गडी राखून पराभव केला. पापुआ न्यू गिनीने २० षटकात ९ बाद १२९ धावा केल्या. तर, ओमानने एकही गडी न गमावता १३.४ षटकातच सामना जिंकला. या सामन्यात गिनीकडून असद वल्लाने दमदार अर्धशतक ठोकलं पण तो जेव्हा बाद झाला, त्या घटनेची जास्त चर्चा रंगली. वल्लाचा झेल ज्याने टिपला त्या जतिंदरने शिखर धवन स्टाईलचं सेलिब्रेशन केलं.

असद वल्लाने ४३ चेंडूत ५६ धावा केल्या. कलीमुल्लाच्या गोलंदाजीवर मोठा फटका खेळण्याच्या नादात तजिंदरने त्याचा झेल टिपला आणि त्याला माघारी धाडले. हा झेल टिपल्यानंतर त्याने शिखर धवनच्या स्टाईलमध्ये मांडी थोपटून सेलिब्रेशन केले. त्याच्या खेळीच्या जोरावर पापुआ न्यू गिनीने १२९ धावांपर्यंत मजल मारली. या आव्हानाचा पाठलाग करताना इक्बाल इलियास आणि जतिंदर सिंग यांनी दमदार कामगिरी केली. जतिंदरने ४२ चेंडूत नाबाद ७३ धावांची खेळी केली. तर इलियासने ४३ चेंडूत नाबाद ५० धावा करत त्याला चांगली साथ दिली.