Virat Kohli Dedication : भारत आणि बांगलादेश यांच्यातील पहिल्या कसोटीत नाणेफेक जिंकून प्रथम फलंदाजी करणाऱ्या भारताची अवस्था 3 बाद 48 धावा अशी झाली होती. दोन्ही सलामीवीरांनी 41 धावांची सलामी दिली. मात्र त्यानंतर बांगलादेशचा डावखुरा फिरकी गोलंदाज तैजुल इस्लामने भारताच्या तगड्या फलंदाजीला खिंडार पाडण्यास सुरूवात केली. त्याने भारताची सर्वात महत्वाची विकेट घेतली. तैजुलने विराट कोहलीला अवघ्या 1 धावेवर पॅव्हेलियनचा रस्ता धरायला लावला.

विराट कोहली पहिल्याच कसोटीत अवघ्या 1 धावेवर बाद झाल्यानंतर सोशल मीडियावर अनेक पोस्ट व्हायरल होत होत्या. त्यात विराटचे शतक अवघ्या 99 धावांनी हुकले अशा पोस्टचा समावेश होता. मात्र यात सर्वांमध्ये एका फोटोने सोशल मीडियावर सर्वांचे लक्ष वेधून घेतले. या फोटोत दिसते की विराट कोहली बाद झाल्यानंतर ड्रेसिंग रूममध्ये न बसता नेटमध्ये फलंदाजीचा सराव करण्यात गेला होता. सराव करताना देखील विराटने डावखुऱ्या फिरकी गोलंदाला खेळण्याचा सराव केला. चहापानावेळी विराट कोहलीचा हा व्हिडिओ सध्या सोशल मीडियावर व्हायरल होत आहे. हा फोटो स्पोर्ट्स यारीने पोस्ट केला आहे.

दरम्यान, विराट कोहली बाद झाल्यानंतर आलेल्या ऋषभ पंतने 45 चेंडूत धडाकेबाज 46 धावा करत भारताला शतकी मजल मारून दिली. पंत बाद झाल्यानंतर श्रेयस अय्यर आणि चेतेश्वर पुजारा यांनी पाचव्या विकेटसाठी 149 धावांची भागीदारी रचत भारताला 261 धावांपर्यंत पोहचवले. मात्र शतकाच्या उंबरठ्यावर असणाऱ्या चेतेश्वर पुजाराला तैजुलने 90 धावांवर बाद करत ही जोडी फोडली.