India Vs Pakistan Asia Cup T20 : आशिया कप सुपर 4 च्या दुसऱ्या सामन्यात आज भारत आणि पाकिस्तान एकमेकांना भिडणार आहेत. या सामन्यात सर्वांची नजर ही विराट कोहलीवर (Virat Kohli) असणार आहे. त्याने हाँगकाँग विरूद्धच्या सामन्यात 59 धावांची खेळी करत आपण पुन्हा फॉर्ममध्ये येत असल्याचे संकेत दिले होते. विशेष म्हणजे विराट कोहली पाकिस्तान विरूद्धच्या सामन्यात टी 20 क्रिकेटमधील एक खास माईल स्टोर पार करण्याच्या उंबरठ्यावर उभा आहे.

विराट कोहली टी 20 क्रिकेटमध्ये एक खास शतक (100 Sixes In T20I ) पूर्ण करण्यापासून तीन पावले दूर आहे. विराट कोहलीने आतापर्यंत 101 आंतरराष्ट्रीय टी 20 सामने खेळले आहेत. त्याने 93 डावात आतापर्यंत 97 षटकार मारले आहेत. पाकिस्तानविरूद्धच्या सामन्यात त्याने 3 षटकार मारले तर तो टी 20 मध्ये षटकारांचे शतक पूर्ण करणाऱ्या फलंदाजांच्या खास क्लबमध्ये सामील होईल. विराट कोहलीने आशिया कपमधील दोन सामन्यात चार षटकार मारले आहेत. त्याने पाकिस्तानविरूद्ध एक आणि हाँगकाँग विरूद्ध तीन षटकार मारले आहेत.

आंतरराष्ट्रीय क्रिकेटमध्ये सर्वाधिक षटकार मारण्याचा विक्रम न्यूझीलंडच्या मार्टिन गप्टिलच्या नावावर आहे. त्याने सर्वाधिक 172 षटकार मारले आहेत. या यादीत भारताचा कर्णधार रोहित शर्मा दुसऱ्या स्थानावर आहे. त्याने आतापर्यंत टी 20 क्रिकेटमध्ये 165 षटकार मारले आहेत. तर या यादीत तिसऱ्या स्थानावर असलेल्या वेस्ट इंडीजच्या ख्रिस गेलने 75 डावात 124 षटकार मारले आहेत. आतापर्यंत 9 फलंदाजांनी टी 20 क्रिकेटमध्ये षटकारांचे शतक पूर्ण केले आहे. ऑस्ट्रेलियाचा ग्लेन मॅक्सवेल आणि वेस्ट इंडीजच्या किरॉन पोलार्डने प्रत्येकी 99 षटकार मारले आहेत. विराट कोहलीला या दोघांनी मागे टाकण्याची संधी आहे.