Wasim Akram : भारतीय गोलंदाजांनी यंदाच्या वर्ल्डकपमध्ये आपल्या दमदार गोलंदाजीने संपूर्ण जगाचे लक्ष आपल्याकडे वेधून घेतले आहे. भारताचे मोहम्मद शामी, मोहम्मद सिराज आणि जसप्रीत बुमराह हे त्रिकूट सध्या प्रत्येक संघाच्या मानत धडकी भरवत आहे.

नुकत्याच झालेल्या श्रीलंकेविरूद्धच्या सामन्यात भारताने प्रथम फलंदाजी करताना 357 धावा केल्या होत्या. त्याच्या प्रत्युत्तरात खेळणाऱ्या श्रीलंकेचा भारतीय गोलंदाजांनी 55 धावात खुर्दा उडवला होता. मोहम्मद शामीने 5 विकेट्स घेतल्या होत्या तर सिराजने 3 विकेट्स घेतल्या.

दरम्यान, भारतीय गोलंदाजांची ही भन्नाट कामगिरी पाकिस्तानच्या माजी खेळाडू हसन रझाच्या पचनी पडली नव्हती. त्याने पाकिस्तानी टीव्ही चॅनलवर अकलेचे तारे तोडत भारताला आयसीसी विशेष चेंडू देत फेव्हर करत असल्याचे वक्तव्य केलं होतं.

आता पाकिस्तानचा माजी कर्णधार वसिम अक्रमनेच त्याला घरचा आहेर दिला आहे. वसिम अक्रम हसन रझाच्या वक्तव्यावर म्हणाला, 'तू स्वतःचा अपमान स्वतःच करून घेतला आहेसच. मात्र तू संपूर्ण जगासमोर आमचा देखील अपमान का कर आहेस. सर्वात प्रथम मैदानात अपायर्स, सामना अधिकारी आणि बरेच लोक स्टेडियममध्ये असतात.'

'दुसरी गोष्ट म्हणजे तंत्रज्ञान किंवा दुसरी कोणतीही गोष्ट कशी काय चेंडूचा स्विंग कमी जास्त करू शकते. भारतीय गोलंदाज जगात भारी आहेत. त्यांच्याकडे गुणवत्ता आणि कौशल्य आहे. त्यामुळेच ते इतर गोलंदाजांपेक्षा जास्त चांगली कामगिरी करत आहेत.'