Women IPL 2023 : भारतीय क्रिकेट नियामक मंडळ (BCCI) मार्चमध्ये महिला आयपीएल सुरू करणार आहे. स्पर्धेच्या पहिल्या सत्राचे मीडिया हक्क विकले गेले आहेत. Viacom18 ने 951 कोटी रुपयांना पाच वर्षांसाठी प्रसारण हक्क विकत घेतले आहेत. आता या स्पर्धेची ताजी माहिती समोर येत आहे की ही स्पर्धा 4 मार्चला सुरू होऊ शकते आणि त्याच महिन्याच्या 26 तारखेला अंतिम सामना खेळल्या जाऊ शकतो.

मीडिया रिपोर्ट्सनुसार, महिलांचे आयपीएल सामने मुंबईतील ब्रेबॉर्न स्टेडियम आणि डीवाय पाटील स्टेडियमवर होऊ शकतात. पहिल्या सत्रात एकूण 22 सामने खेळल्या जाणार आहेत. पुरुषांच्या आयपीएलसाठी मुंबईचे वानखेडे स्टेडियम सज्ज ठेवण्यात येणार आहे. पुरुषांची आयपीएल 31 मार्च किंवा 1 एप्रिलपासून सुरू होण्याची शक्यता आहे.

बक्षिसाची रक्कम किती ?

महिला आयपीएलमधील खेळाडूंची बक्षीस रक्कम 10 कोटी रुपयांपर्यंत असू शकते. ही स्पर्धा जिंकणाऱ्या संघाला 12 कोटी रुपये मिळू शकतात. त्याचबरोबर उपविजेत्याला तीन कोटी रुपये देण्याची शक्यता आहे. तिसऱ्या क्रमांकावर असलेल्या संघाला 1 कोटींवर समाधान मानावे लागू शकते.

प्लेइंग इलेव्हनमध्ये किती परदेशी राहतील?

पुरुषांच्या आयपीएल दरम्यान एका संघाच्या प्लेइंग-11 मध्ये जास्तीत जास्त चार विदेशी खेळाडू असतात. महिलांच्या आयपीएलमध्ये हा नियम मोडला जाऊ शकतो. प्लेइंग-11 मध्ये पाच परदेशी खेळाडूंना परवानगी दिली जाईल, परंतु त्यापैकी एक सहयोगी देशाचा असेल.